13.10.2026 | 22:55
Նոր Արեշի տներից մեկում հրդեհ է բռնկվել
Հանրության մի ստվար մասը պատրաստ է առողջության ապահովագրության համակարգի ներդրմանը. նախարար
Հասարակություն
07.08.2019 | 11:30
Առողջապահության նախարար Արսեն Թորոսյանը Ֆեյսբուքի իր էջում ամփոփել է օրեր առաջ իր տեղադրած հարցման արդյունքները։
Հիշեցնենք, որ նախարարը հետեւյալ հարցումն էր ձեւակերպել.
«Ինչպե՞ս եք վերաբերվում Հայաստանում առողջության համապարփակ պետական ապահովագրության համակարգի ներդրմանը, որն աշխատող բնակչությունից կպահանջի որոշակի ամսական վճարումներ աշխատավարձի 3-5% չափով՝ ի հավելումն եկամտահարկի, կընդգրկի տարիքային բոլոր խմբերը և կներառի պոլիկլինիկական, շտապ և հիվանդանոցային բուժսպասարկման հիմնական ծավալը և անվճար դեղորայք` մի շարք հիվանդությունների տնային պայմաններում բուժման համար»։ Պատասխանի տարբերակներն էին՝ դրական, բացասական։
Այժմ նախարարը Ֆեյսբուքի իր էջում գրել է.
«Քանի որ քվեարկությունը ամփոփվեց, կարող ենք արձանագրել, որ հանրության մի ստվար մասը պատրաստ է առողջության ապահովագրության համակարգի ներդրմանը, ինչը տեղի կունենա մոտակա մի քանի տարիների ընթացքում:
Կուզենամ անպայման ֆիքսենք, որ այն մեր քաղաքացիների սոցիալական պաշտպանությանն ուղղված համակարգ է, և ոչ թե ֆինանսական համակարգ, ինչպիսին կամավոր ապահովագրությունն է։ Այն ապահովելու է այսպես կոչված աղետալի առողջապահական ծախսերի (catastrophic health expenditures) վերացումը համակարգում ներգրավված բոլոր անձանց համար, որոնք դեպքերի մի մասում բերում էին ընտանիքների աղքատացման։ Նոր համակարգի ներդրման ժամանակ այսօր գործող բոլոր պետական երաշխիքները մնալու են ուժի մեջ։
Մոտակա ամիսներին նաև կներկայացնենք առողջության ապահովագրության հայեցակարգը հանրային լայն քննարկումների համար»:
