«Չի նշանակում՝ ՀԱՊԿ-ն չի արձագանքում, ուրեմն մի լուրջ բան կա»․ Սասուն Միքայելյան. ՏԵՍԱՆՅՈՒԹ

Հուլիսի վերջին տասնօրյակը աչքի ընկավ հայ-ադրբեջանական սահմանին լարվածությամբ։ Հայկական կողմն ունեցավ զոհ ու վիրավոր։ ՀՀ ԶՈւ ԳՇ պետ Արտակ Դավթյանը պարզաբանեց, որ լարվածությունը կապված չի եղել հայկական Զինված ուժերի գործունեության հետ, այլ ընդամենն ադրբեջանական սադրանք էր։

Այն, որ Տավուշի հետ սահմանին իրավիճակը լարված է, ըստ Դավթյանի, նորություն չէ։ Այդպիսի պահեր լինում նաև Գեղարքունիքի և Նախիջևանի հատվածներում։ Նորություն չէ նաև Հայաստանի ռազմավարական գործընկեր համարվող Ռուսաստանի գլխավորած ռազմական դաշինքի՝ ՀԱՊԿ-ի լռությունը։ Այս կառույցն անարձագանք թողեց և նույնիսկ պաշտոնական հայտարարություն չարեց Հայաստանի ու Ադրբեջանի սահմանի լարվածության վերաբերյալ։

Այսօր Ստեփանակերտում մեկնարկում են համահայկական խաղերը, ինչի առիթով Արցախում են ՀՀ բարձրագույն ղեկավար կազմը, ԱԺ պատգամավորներ։ Factor TV-ն ԵԿՄ նախագահ, ԱԺ «Իմ քայլը» խմբակցության պատգամավոր Սասուն Միքայելյանին խնդրեց մեկնաբանել՝ ինչո՞վ կարող է պայմանավորված լինել ՀԱՊԿ-ի լռությունը։

Միքայելյանը նախ պատասխանեց․ «Ով պաշտոնյա է, իրենից հարցրեք»։ Կրկին ճշտեցինք՝ որպես պատգամավոր՝ ինքն ակնկալո՞ւմ է ռազմական դաշինքի արձագանքը, քանի որ այն Հայաստանի անվտանգության ապահովման պարտավորություն է ստանձնել: «Նման դեպքեր շատ են եղել, որ չի արձագանքել։ Չի նշանակում՝ ՀԱՊԿ-ը չի արձագանքում, ուրեմն մի լուրջ բան կա»,- ասաց Միքայելյանը։

Իսկ թե ինչու այս անգամ լարվածությունը տեղափոխվեց Հայաստանի սահման, Սասուն Միքայելյանն առանձնահատուկ գործոնով չպայմանավորեց․ «Կապ չունի՝ Հայաստանի Հանրապետության սահմանում են կրակոցները, թե Արցախում: Մենք պետք է միշտ պատրաստ, զգոն լինենք։ Իրավիճակից ելնելով՝ ինչ-որ պահ է ստեղծվել, կրակոցներ են»։

Իշխանական պատգամավորը հավելեց, որ Հայաստանը պետք է սերտ կապեր ունենա Ռուսաստանի հետ, նաև հիշեցրեց, որ այդ երկրից ենք ստանում սպառազինության զգալի չափաբաժինը:

Մանրամասները՝ տեսանյութում:

Ռոբերտ Անանյան