Փաշինյանի հրավիրած հանրահավաքին միջադեպ է գրանցվել, կրքերը լարվել են

Ստեփանակերտի «Վերածնունդի» հրապարակում վարչապետ Նիկոլ Փաշինյանի հրավիրած հանրահավաքը, որին նա հետո աշխարհաժողով անունը տվեց, չանցավ առանց միջադեպերի։ Factor.am-ի տեսախցիկն արձանագրեց նույնիսկ ֆիզիկական ընդհարման փաստ։

Բանն այն է, որ հանրահավաքին մասնակցում էին Արցախի քաղաքական առանցքային ուժերը՝ սեփական կարգախոսներով, պաստառներով ու նպատակներով։ Սկզբում հրապարակ եկան «Ազատ հայրենիք» կուսակցության աջակիցները։ Ու թեև այս քաղաքական ուժի ղեկավար, նախկին վարչապետ Արայիկ Հարությունյանը խոստացել էր իր կողմից 10.000 մարդ «ապահովել», փաստ է, որ նրա համախոհների թիվը չէր հասնում այդքանի։ Այդպես կարելի է դատել առնվազն երթի մասնակիցների թվաքանակից։ Ի դեպ, չնկատվեց ինքը՝ Արայիկ Հարությունյանը։ Արցախի իշխող կուսակցության աջակիցներն «Ազատ հայրենիք» էին վանկարկում, և դա անում էին հատկապես այն պահերին, երբ ակտիվանում էին Սամվել Բաբայանի աջակիցները, որոնք եկել ու տեղավորվել էին իշխանական ուժի համակիրներին շատ մոտ։ Ընդդիմադիրները Բակո Սահակյանի ելույթը նպատակադրված ընդհատում էին սուլոցներով, «հեռացի՛ր», «Բաբայա՛ն» վանկարկումներով։

Նրանց ձայնը երբեմն այնպես ուժգին էր, որ հաճախ խլացնում էր բարձրախոսով ելույթ ունեցող Բակո Սահակյանի խոսքը։ Նախագահը մեծ ջանքերի գնով կարողացավ ավարտել ելույթը։ «Միասնական հայրենիք» ցուցապաստառներ կային Արցախի նախկին ՊԲ հրամանատար Բաբայանի աջակիցների գլխավերևում։ Այդ անունով, ենթադրվում է, կարող է անվանվել Սամվել Բաբայանի ստեղծելիք կուսակցությունը։ Նա մտադիր է 2020 թվականին առաջադրվել թե՛ իբրև նախագահի թեկնածու, թե՛ մասնակցել խորհրդարանական ընտրություններին, ինչը մյուս շրջանակների հետ հարաբերությունները լարելու պատճառ է դարձել։ Ընդդիմադիրների ձեռքին էր նաև մեկ ուրիշ գրությամբ պաստառ՝ «Բացառել գործող համակարգի վերարտադրությունը»։ Դա Սամվել Բաբայանի նշանաբանն է, ինչ նա թավշյա հեղափոխությունից հետո՝ 2018 թվականի հունիսի 15-ին, դուրս եկավ բանտից։ Նա կարծում է, որ Սահակյանը նախագահական երրորդ ժամկետն անցկացնում է ապօրինի, քանի որ Սահմանադրությունը թույլ է տալիս մեկ անձին նախագահ լինել երկու անգամից ոչ ավելի։ Մյուս կողմից՝ Բակո Սահակյանն իր երրորդ ժամկետն անցումային է համարում։

Սամվել Բաբայանի աջակիցները միանգամից փոխեցին վանկարկումների բովանդակությունը և տոնը, երբ Արցախի նախագահը խոսքի իրավունք տվեց ՀՀ վարչապետ Նիկոլ Փաշինյանին, որն արժանացավ թե՛ Բաբայանի, թե՛ Արայիկ Հարությունյանի կողմնակիցների ծափողջույններին։ Ըստ շրջանառվող լուրերի՝ նախագահի աթոռի այս երկու թեկնածուներն էլ ակնկալում են ՀՀ վարչապետի աջակցությունը ստանալ, ու դրա համար, փաստորեն, չեն խնայում ոչ մի ջանք։

Լարվածությունը քաղաքական հակադիր թիմերի միջև աճեց աստիճանաբար։  Factor.am-ի տեսախցիկն արձանագրեց ֆիզիկական ընդհարման փաստ Սամվել Բաբայանի և Արայիկ Հարությունյանի կողմնակիցների միջև։ Սակայն հավաքվածները տարածքից հեռացրին միջադեպին մասնակցող Բաբայանի կողմնակցին։ Կրքերը թուլացրեց տարեց մի տղամարդու՝ «Ձեզ ղարաբաղցուն վայել պահեք» խիստ զգուշացումը։ Կանայք ևս հաշտարարի դեր կատարեցին՝ հանգստացնելով մասնակիցներին։ Այս դրվագը նկատեցին թե՛ հարթակում գտնվող պաշտոնյաները, թե՛ հավաքվածներից շատերը։ Հանրահավաքը բնականոն շարունակվեց։ Վերջում Վերածննդի հրապարակում հավաքվածներին սպասվում էր շքեղ հրավառություն։

Ռոբերտ Անանյան