Մի քանի տասնյակ աշխատակիցներ պետք է աշխատանք փնտրեն. Տիգրան Խաչատրյանը՝ ՊՈԱԿ-ի լուծարման մասին. ՏԵՍԱՆՅՈՒԹ

Կառավարությունն այսօրվա նիստում որոշեց լուծարել «Անասնաբուժասանիտարիայի և բուսասանիտարիայի ծառայությունների կենտրոն» ՊՈԱԿ-ը: Նախագիծը մշակվել է վարչապետի որոշմամբ: ՊՈԱԿ-ի գործառույթներն իրականացնելու է Էկոնոմիկայի նախարարությունը:

Կառավարության նիստից հետո Factor.am-ն էկոնոմիկայի նախարար Տիգրան Խաչատրյանից հետաքրքրվեց՝ արդյո՞ք նախարարությունը պատրաստ է իրականացնել ՊՈԱԿ-ի գործառույթները, քանի որ այն զբաղվում է խոշոր և մանր եղջերավոր անասունների հիվանդությունների կանխարգելմամբ:

«Ընդհանուր առմամբ՝ տարեկան 13 պատվաստում է իրականացվում, իսկ մեխանիզմը հետևյալն է. ՊՈԱԿ-ի աշխատակիցներն այդ աշխատանքը հանրապետության բոլոր համայնքներում կատարելու համար պայմանագրային հիմունքներով պատվիրում են այնտեղ գտնվող մասնագետներին և այնտեղի մասնագետներն իրականացնում են այդ պատվաստումը: ՊՈԱԿ-ի աշխատակազմը ներկա աշխատակիցներով կազմակերպչական բնույթի է, դրա համար պահվում է որոշակի մասնագիտական կազմ, ինչպես նաև պահվում է զգալի քանակով սպասարկող անձնակազմ»,- ասաց նախարարը:

«Անասնաբուժասանիտարիայի և բուսասանիտարիայի ծառայությունների կենտրոն» ՊՈԱԿ-ն այս պահին ունի 150 աշխատակից: Տիգրան Խաչատրյանը, սակայն, չգիտի, թե նրանցից քանիսը կտեղափոխվեն Էկոնոմիկայի նախարարություն: Նա չբացառեց, որ մի քանի տասնյակ աշխատակիցներ գործազուրկ կդառնան:

«Ես չգիտեմ, թե որքանն է տեղափոխվելու, հիմնական մասնագիտական կազմը պահպանվելու է: Մի քանի տասնյակ աշխատակիցներ, որոնք սպասարկման բնույթի աշխատանք էին իրականացնում, կարող է՝ չշարունակեն իրենց աշխատանքը: Նրանք աշխատանք պետք է փնտրեն այլ ոլորտում»,- նշեց նախարարը:

Մանրամասները՝ տեսանյութում:

Նարեկ Կիրակոսյան