07.01.2026 | 23:32
Սպիտակ տանը հայտարարել են, որ ռուսական դրոշի տակ նավարկող կալանված լցանավի անձնակազմին սպառնում է քրեական հետապնդում
Ամերիկահայ լրագրողը երրորդ անգամ «Էմմի» մրցանակի է արժանացել
Հասարակություն
01.08.2019 | 12:51
Ամերիկահայ լրագրող Փիթեր Մուսուրլյանը երրորդ անգամ «Los Angeles Area Emmy Awards»-ի մրցանակակիր է դարձել: Այս մասին գրում է Ամերիկայի հայկական Asbarez պարբերականը:
Մուսուրլյանը մրցանակին արժանացել է «Մենախոսություն Հոլոքոստի մասին» փաստավավերագրական ֆիլմի համար, որը 2018-ի մայիսին ցուցադրվել է ամերիկյան PBS հեռուստաալիքով: 52 րոպե տևողությամբ ֆիլմի սցենարի, ինչպես նաև նկարահանման և մոնտաժի աշխատանքները լրագրողն անձամբ է կատարել:
«Պապս Հայոց ցեղասպանությունից փրկվածներից է, և ես մեծացել եմ մի միջավայրում, որտեղ շարունակ պատմություններ եմ լսել այն մասին, թե նա ինչերի միջով է անցել: Ֆիլմի միջոցով ցանկացել եմ ներկայացնել այն ամենը, ինչի միջով անցել է պապս, ինչպես նաև մյուսները, որոնք վերապրել են Ցեղասպանությունը»,- ասել է Մուսուրլյանն իր ելույթի ընթացում:
Լրագրողը «Los Angeles Area Emmy Awards» հեղինակավոր մրցանակին արժանացել է նաև 2012 և 2016 թվականներին:
Իսկ այս տարեսկզբին «Լավագույն տեսագրություն» անվանակարգում Մուսուրլյանին լոսանջելեսյան մամուլի ակումբի մրցանակն էր շնորհվել:
Նելլի Մելքոնյան
