«Թպրտացող եք՝ Ամերիկայի, Եվրոպայի դեմ թպրտացեք, եկել են Հայաստանում իրենց աքլոր են զգում»․Պարույր Հայրիկյան

ԱԻՄ նախագահ Պարույր Հայրիկյանը factor.am-ի հետ զրույցում Հայաստանում ռուսաց լեզուն հատուկ հայեցակարգով դպրոցներ մտցնելը համարում է «հետընթաց» 26-ամյա անկախության ճանապարհին և «Ռուսաստանի խամաճիկ դրածոների ձեռքի գործը»։

«Թպրտացող եք՝ Ամերիկայի, Եվրոպայի դեմ թպրտացեք, եկել են Հայաստանում թպրտում են, իրենց աքլոր են զգում։ Կթպրտան, կթպրտան, կխելոքանան, մենք մենակ չենք։ Եթե մենք քաղաքակիրթ աշխարհի հետ լինենք, մենք մենակ չենք, իրենք են մենակ»,- ասաց Հայրիկյանը։

Ստալինյան բռնաճնշումների ենթարկվածների մասին վերջերս Թումանյանի թանգարանում բացված ցուցահանդեսն արգելելը խորհրդային տարիների քաղբանտարկյալը «ռուսական իմպերիալիզմի թափթփուկների գործն է համարում»։

«Ռուսական իմպերիալիզմի թափթփուկները ուզում են իրենց ներկայությունը ցույց տալ Հայաստանում։ Իսկ իրենց ներկայությունը կարող են ցույց տալ մեր ազգային արժեքային համակարգը զրոյացնելով, առողջ բանականությունը ոչնչացնելով։ Այդ ցուցահանդեսի ընդհատումը այդպիսի քայլերից մեկն էր»,- նշեց Հայրիկյանը՝ հավելելով, որ իրենք աիմականներով այցելել են և բարձր են գնահատում այդ ցուցահանդեսի շրջանակում կատարված գործը, քանի որ «բոլշևիկյան բռնապետության արարքներին ամբողջական գնահատական դեռ չի տրվել»։

ԱԻՄը պաշտպանելու է ԵՏՄ-ից դուրս գալու՝ «Ելք»-ի նախաձեռնությունը։ «Այն, ինչ առաջարկում է «Ելք»-ը, փաստական անկախությունը վերականգնելուն ուղղված քայլ է։ Բոլորս էլ հասկանում ենք, որ ԵՏՄ կոչվածը հակաքաղաքակրթական, աշխարհի հետ տնտեսական հարաբերությունները սահմանափակող և մեզ դեպի կործանում տանող միավորում է»,- նշեց Հայրիկյանը՝ հավելելով․ «Քաղաքակիթ աշխարհի հետ չլինել, նշանակում է գնալ ինքնասպանության։ Մեր ժողովուրդը որքան էլ հուսահատված լինի, դեռևս էդ մակարդակի չի …»։

Մանրամասները դիտեք factor.am-ի հետ ԱԻՄ նախագահ Պարույր Հայրիկյանի հարցազրույցում։

Մարինե Խառատյան