17.09.2026 | 23:38
Սամվել Կարապետյանի տնային կալանքը երկարաձգվել է
«Ավրորա»-ի դափնեկիր Թոմ Քաթինային կփոխարինի երիտասարդ բժիշկ Արմեն Մկրտչյանը
Հասարակություն
26.07.2019 | 21:05
«Ավրորա» մրցանակի դափնեկիր, ամերիկացի բժիշկ, կաթոլիկ միսիոներ Թոմ Քաթինային կփոխարինի երիտասարդ բժիշկ Արմեն Մկրտչյանը:
Տեղեկությունը Factor.am-ին փոխանցեց Արմեն Մկրտչյանը:
«Առաքելությունը նախատեսված է օգոստոսի 20-ից մինչ հոկտեմբերի 20-ը, բայց ես մեկ շաբաթ շուտ կգնամ, որ ծանոթանամ Թոմ Քաթինայի եւ իրավիճակի հետ»,- ասաց բժիշկը:
Բանն այն է, որ Թոմ Քաթինան, հանդիսանալով «Ավրորա» մարդասիրական նախաձեռնության նախագահ, օգոստոսի 20-ից մինչ հոկտեմբերի 20-ը բացակայելու է Սուդանից, որպեսզի մասնակցի միջոցառման:
Գյումրու մոր և մանկան ավստրիական հիվանդանոցի մանկաբարձ-գինեկոլոգ Արմեն Մկրտչյանը «Ավրորա» մարդասիրական նախաձեռնության կողմից ընտրվել է որպես Սուդանում բժիշկ Թոմ Քաթինային փոխարինող:
«Թոմ Քաթինան նշել է, որ իր բացակայությունը կլինի միայն այն ժամանակ, երբ իրեն փոխարինող լինի: Երբ առաջարկեցին ինձ, մի փոքր անակնկալի եկա, երկար մտածեցի եւ համաձայնեցի փոխարինել Թոմ Քաթինային՝ աշխարհահռչակ բժշկին, ում տարերքն է մարդասիրական գործունեությունը»,- նշեց Արմեն Մկրտչյանը:
Բժշկի խոսքով՝ իր մասին Սուդանում տեղեկացել են ընդհանուր ընկերների միջոցով, ովքեր ապրում եւ աշխատում են արտասահմանում:
Արմեն Մկրտչյանը 35 տարեկան է, ոլորտում է 2007 թվականից:
Հիշեցնենք, որ 2017 թվականի մայիսին բժիշկ Քաթինան «Ավրորա» մրցանակի դափնեկիր հռչակվեց Նուբա լեռներում իր անձնուրաց աշխատանքի համար։
Նա 2008 թվականից «Գթության մայր» հիվանդանոցում մշտական ներկայություն ունեցող միակ վիրաբույժն է: Նա նաև այս հիվանդանոցի համահիմնադիրն է:
Բժիշկ Քաթինան սպասարկել է ավելի քան կես միլիոն մարդկանց՝ բուժօգնություն տրամադրելով թե՛ տարատեսակ առողջական խնդիրներ ունեցող հիվանդներին, թե՛ պատերազմի վիրավորներին։
Նարեկ Կիրակոսյան
