Արցախի իշխանությունները ո՛չ Սամվել Բաբայանին, ո՛չ որևէ մեկին չեն ահաբեկում. Դավիթ Բաբայան

Արցախի նախագահի խոսնակ Դավիթ Բաբայանը վստահեցնում է՝ Արցախի իշխանությունն ապատեղեկատվություն չի տարածել Սամվել Բաբայանի կողմից Արցախում ճանապարհներ փակելու վերաբերյալ, ինչպես ասված է Բաբայանի գրասենյակի տարածած հաղորդագրության մեջ։

«Ցանկացած գործունեություն պետք է իրականացվի օրենքի տառին խիստ համահունչ։ Արցախում չպետք է լինեն արտոնյալներ կամ թշվառներ, յուրաքանչյուրը պետք է իր գործունեությունը ծավալի օրենքի սահմաններում։ Եթե օրենքը թույլ է տալիս հանրահավաքներ անցկացնել, ապա բոլորն օրենքի տառին համապատասխան ազատ են հավաքներ կազմակերպել: Իսկ թե մամուլն ի՞նչ է գրել կամ Սամվել Բաբայանի գրասենյակն ինչպե՞ս է այդ հրապարակմանն արձագանքել, որևէ բան չեմ կարող ասել»,-Factor.am-ի հետ զրույցում ասաց Դավիթ Բաբայանը։

Անդրադառնալով Սամվել Բաբայանի գրասենյակի տարածած հայտարարության այն հատվածին, թե Բակո Սահակյանն ուժային կառույցների միջոցով փորձում է ահաբեկել մարդկանց, Դավիթ Բաբայանն ասաց. «Առհասարակ որևէ մեկը որևէ մեկին ահաբեկելու իրավունք չունի, կա օրենքով սահմանված կարգ՝ ազատ և թափանցիկ ընտրություն անցկացնելու համար։ Իշխանությունների կողմից ո՛չ Սամվել Բաբայանի, ո՛չ որևէ մեկի նկատմամբ օրենքին հակասող որևէ գործողություն չի կատարվել: Ինչ վերաբերում է նրան, թե Բակո Սահակյանն օրենքը խախտելով է առաջադրվել 3 անգամ, ապա պետք է նշեմ, որ անցումային այս փուլը նախատեսված է եղել Սահմանադրությամբ։ Երեք տարի՝ 2017-2020 թվականներին, ընտրություններ չեն լինելու, իսկ գործող նախագահն արդեն հայտարարել է, որ 2020-ի ընտրություններին չի առաջադրվելու»:

Հիշեցնենք, որ Սամվել Բաբայանի գրասենյակը հայտարարություն էր տարածել, որում, մասնավորապես, ասվում էր.

««Լուսաբանումները», թե Սամվել Բաբայանը պատրաստվում է փակել միջպետական ճանապարհներ, չեն համապատասխանում իրականությանը, զուտ այն պատճառով, որ դա դեմ է Սամվել Բաբայանի պետականամետ դիրքորոշմանը և առհասարակ դեմ է առողջ հասարակարգի ձևավորման նրա մոտեցումներին։ Սամվել Բաբայանը շատ լավ գիտի Արցախի ազատագրման գինը և նրա պահպանման բոլոր երաշխիքները:

Արցախի ապակայունացմանը գնացող գործընթացները զուգահեռներ չեն կարող ունենալ Բաբայանի քաղաքական պատկերացումների հետ։ Ուստի կոչ ենք անում անձին արատավորող և նրա գաղափարներին դեմ գնացող՝ այս մակարդակի հոդվածները գրելուց առաջ ճշտել տվյալ կողմի դիրքորոշումը։

Սա Արցախի Հանրապետության իշխանության տարածած ապատեղեկատվությունն է, որով փորձում են բխեցնել հետագա իրենց անելիքները: Իշխանությունը զավթած Բակո Սահակյանը, որը երրորդ անգամ առաջադրվեց նախագահի պաշտոնում ապօրինի, հակասահմանադրական ճանապարհով, այսօր ուժային կառույցների միջոցով փորձում է ահաբեկել մարդկանց: Չի ստացվելու, պայթել են այն վախի ձևաչափերը, որոնք տարիներ շարունակ կիրառվել են Արցախում»:

Աղավնի Սուքիասյան