08.12.2025 | 12:34
Ֆորմուլա-1-ը նոր չեմպիոն ունի․ ՏԵՍԱՆՅՈՒԹ
Քաղավիացիայի կոմիտեից մանրամասներ են հայտնում Հուրգադա-Երևան չվերթի չեղարկման մասին
25.07.2019 | 16:23
Քաղավիացիայի պետական կոմիտեի տեղեկություններով՝ Հուրգադա-Երևան չվերթը ոչ թե չեղարկվել է, այլ 24 ժամով հետաձգվել: Factor.am-ի հետ զրույցում այս մասին ասաց կոմիտեի Օդային փոխադրումների կարգավորման վարչության պետի տեղակալ Ստեփան Փայասլյանը:
«Մեր ունեցած տեղեկություններով՝ 24 ժամով տվյալ չվերթը հետաձգվել է։ Այդ հետաձգումների մասին ընկերությունը երեկ ուշ երեկոյան տեղեկացրել է՝ նշելով, որ չվերթը տեղափոխվում է հուլիսի 26-ին»,- ասաց Փայասլյանը՝ նշելով, որ ավիաընկերությունը չի հայտնել, թե ինչ պատճառներով է հուլիսի 25-ի չվերթը հետաձգվել։
Դիտարկմանը, որ, փաստորեն, ՀՀ քաղաքացիներն ավիաընկերության կողմից չվերթի չպատճառաբանված հետաձգման արդյունքում մի ամբողջ օր ստիպված են մնալ Հուրգադայի օդանավակայանում և կատարել լրացուցիչ ծախսեր, Քաղավիացիայի պետական կոմիտեի պաշտոնյան ասաց. «Մենք կփորձենք մեր հնարավորությունների սահմաններում այդ հարցին միջամտել և աջակցել, սակայն դա մեր պարտականությունը չէ։ Մենք, համենայն դեպս, կհասկանանք, թե ինչ լծակներ ունի պետությունը՝ ազդելու համար այդ գործընթացի վրա»:
Ավելի վաղ տեղեկացրել էինք, որ հուլիսի 25-ին Հուրգադա-Երևան չվերթը չեղարկվել է, որի արդյունքում Եգիպտոսում է մնացել ՀՀ շուրջ 100 քաղաքացի: Տեղեկությունը տարածել էր ՀՀ արտգործնախարարությունը՝ հայտնելով, որ Եգիպտոսում ՀՀ դեսպանությունը ձեռնարկում է բոլոր հնարավոր քայլերը խնդիրը կարգավորելու ուղղությամբ։
Նշենք, որ Հուրգադա-Երևան հետաձգված չվերթը պետք է իրականացներ «ԷՅ ԸՆԴ ԱՐ ՏՈՒՐ» ավիաընկերությունը, որի հետ կապ հաստատել չի հաջողվում։
Հիշեցնենք, որ հուլիսի 23-ին էլ չեղարկվել էին նաև Երևան-Շարմ Էլ Շեյխ և հակառակ ուղղությամբ չվերթները:
Աղավնի Սուքիասյան
