03.04.2026 | 19:35
Կայացել է ՀՀ-ԱՄՆ աշխատանքային խմբի երրորդ հանդիպումը
Հովիկ Աբրահամյանի օրոք ստեղծված Կոռուպցիայի դեմ պայքարի խորհուրդը լուծարվում է
Քաղաքականություն
24.07.2019 | 18:55
Նիկոլ Փաշինյանի կառավարությունը վաղը որոշում կընդունի լուծարել նախկին վարչապետ Հովիկ Աբրահամյանի օրոք ստեղծված Կոռուպցիայի դեմ պայքարի խորհուրդը:
Factor.am-ին հայտնի դարձավ, որ կառավարությունում շրջանառվում է արդարադատության նախարարության կողմից հեղինակած որոշման նախագիծ, որով ուժը կորցրած է ճանաչվելու 2015 թվականի փետրվարի 19-ին ուժի մեջ մտած կառավարության 165-Ն որոշումը: Կոռուպցիայի դեմ պայքարի խորհուրդը, որն ստեղծվել էր Հովիկ Աբրահամյանի օրոք և շարունակեց գոյություն ունենալ Կարեն Կարապետյանի օրոք, աչքի ընկնող որևէ փոփոխություն չիրականացրեց:
Այս խորհուրդը Նիկոլ Փաշինյանի իշխանության օրոք ևս պարապուրդի էր մատնված, այն որևէ նիստ չգումարեց: Իսկ վերջերս ստեղծվեց հակակոռուպցիոն քաղաքականության խորհուրդ, որի առաջին նիստը վարչապետ Նիկոլ Փաշինյանի գլխավորությամբ տեղի ունեցավ հուլիսի 12-ին:
Ըստ էության այս երկու խորհուրդների կազմերը չեն տարբերվում միմյանցից: Ինչպես Կոռուպցիայի դեմ պայքարի խորհուրդը, այնպես էլ հակակոռուպցիոն քաղաքականության խորհուրդը ղեկավարում է ՀՀ վարչապետը, իսկ խորհրդի կազմում են փոխվարչապետը, վարչապետի աշխատակազմի ղեկավարը, արդարադատության նախարարը, ԱԺ խմբակցություններից մեկական անդամներ և ՀԿ ներկայացուցիչներ:
Նարեկ Կիրակոսյան
