«ԵՄ-ն պատրաստ է զգալի ֆինանսական աջակցություն ցուցաբերել ՀՀ արդարադատության բարեփոխմանը». Պյոտր Սվիտալսկի. ՏԵՍԱՆՅՈՒԹ

Եվրամիությունը Հայաստանի դատաիրավական համակարգում որևէ բարեփոխում չի պարտադրում։ Այս մասին այսօր Հայաստան-ԵՄ հարաբերություններին և ՀՀ-ում իր դիվանագիտական առաքելության ամփոփմանը նվիրված ասուլիսի ընթացքում նշեց Հայաստանում ԵՄ դեսպան Պյոտր Սվիտալսկին։

«Եվրամիությունում չկա  արդարադատության ոլորտում բարեփոխման մեկ միասնական մոդել։ Նման խնդիրներ կան նաև ԵՄ անդամ մյուս պետություններում։ Մենք չենք ցանկանում որևէ բան պարտադրել, այդուհանդերձ պատրաստ ենք մոբիլիզացնել փորձագիտական ներուժը և կիսվել այն փորձով, որը կուտակվել է այլ երկրներում իրականացված բարեփոխումների արդյունքում»,- նշեց Սվիտալսկին։

Նրա խոսքով՝ ԵՄ-ն շատ հստակ աջակցությամբ է հանդես եկել ՀՀ-ում դատաիրավական բարեփոխումների գործընթացին և շարունակում է հետևողական լինել՝ մաքուր, արդար, ու արդյունավետ դատական  համակարգ ստեղծելուն։ «Մենք պատրաստ ենք  ապահովել քաղաքական ու խորհրդատվական աջակցություն։ ԵՄ-ն  պատրաստ է տրամադրել նաև զգալի  ֆինանսական աջակցություն՝ դատաիրավական բարեփոխումների գործընթացին»,- նշեց ՀՀ-ում ԵՄ դեսպանը։

Ըստ նրա՝ ԵՄ  աջակցությունը Հայաստանի համար  չափազանց կարևոր է հատկապես ֆինանսական տեսանկյունից: Դեսպանն ընդգծեց, որ Հայաստանի կառավարության և Արդարադատության նախարարության հետ կառուցողական քննարկումներ են ունեցել և անհամբեր սպասում են կոնկրետ նախագծերի, որոնց ևս պատրաստ են աջակցել։

Մանրամասները՝ տեսանյութում:

Նելլի Մելքոնյան