ՍԴ-ն սեփականաշնորհված «բուդկայի» կարգավիճակից պետք է դուրս գա, սա իմ քաղաքական գնահատականն է. Նիկոլ Փաշինյան

Վահե Գրիգորյանի նամակն ինձ ուղղակի ցնցեց, կարդալով այն՝ հասկացա, որ այդ տրանսֆորմացիայի շրջանում բոլորս կենտրոնացած լինելով Սերժ Սարգսյանի շուրջ ստեղծվող քաղաքական մանիպուլյացիայի վրա, գուցե մասնագիտական ինչ-որ նրբությունների չիմացության պատճառով, չենք նկատել մի նույնամասշտաբ մանիպուլյացիա, որը տեղի է ունեցել Սահմանադրական դատարանում: «Ազատություն» ռադիոկայանին տված հարցազրույցում այս մասին ասաց ՀՀ վարչապետ Նիկոլ Փաշինյանը:

«Երբ Սահմանադրական դատարանի փոփոխությունները նախաձեռնվում էին, ասվում էր, որ դա ամբողջական ինստիտուտների բարեփոխման համակարգ է: Ասվում էր, որ մենք գտել ենք, թե ինչպիսին պետք է լինի իդեալական ՍԴ-ն, որը պետք է համապատասխանի մեր այսօրվա կարիքներին, որովհետև ՍԴ-ն այսօրվա ամենավարկաբեկված ինստիտուտներից է, որովհետև այն 1996 թվականից սկսած՝ վավերացրել է բոլոր ընտրակեղծիքները: Եվ, ըստ էության, կար վստահության ճգնաժամ նաև ՍԴ-ի նկատմամբ»,- նշեց վարչապետը:

Նիկոլ Փաշինյանի խոսքով՝ նոր Սահմանադրության հեղինակները ՍԴ-ի իրենց տեսլականն էին ներկայացնում. «Նրանք ասում էին, որ նոր ՍԴ-ն պիտի լինի այսպիսին, ՍԴ դատավորները պիտի լինեն ոչ թե ցմահ, այլ ընտրվեն 12 տարով, որ ՍԴ նախագահը պիտի ընտրվի ոչ թե ԱԺ-ի, այլ ՍԴ-ի կողմից՝ 6 տարի ժամկետով: Այսինքն՝ ամեն 6 տարին մեկ պետք է ունենա ՍԴ նախագահի ընտրություն: Ունե՞նք մենք այդպիսի Սահմանադրական դատարան, որը նկարագրված է մեր Սահմանադրության տեքստի մեջ։ Մենք չունենք»:

Վարչապետի գնահատմամբ՝ այս ամենի պատճառը ներիշխանական գործարքն է: «Նոր Սահմանադրությունը ուժի մեջ մտնելուց 40 օր առաջ Գագիկ Հարությունյանը ՍԴ նախագահի պաշտոնից հրաժարական տվեց, ինչպես հետո պարզվեց՝ ներիշխանական մի գործարքի և մանիպուլյացիայի արդյունքում: Տեղի ունեցավ մեծ առևտուր, որտեղ մի քանի առանցքային դեմքեր ստանում էին իրենց հասանելիքը. Սերժ Սարգսյանը՝ վարչապետի պաշտոնը, Գագիկ Հարությունյանը՝ ԲԴԽ նախագահի պաշտոնը: Եվ նրա փոխարեն ՍԴ անդամ, հետագայում նաև ՍԴ նախագահ առաջադրվեց և Ազգային ժողովի կողմից ընտրվեց Հրայր Թովմասյանը, մինչդեռ նոր Սահմանադրությամբ նախատեսված է, որ ՍԴ նախագահ ընտրում է հենց ՍԴ-ն»,- պարզաբանեց նա:

Ըստ Փաշինյանի՝ ստացվում է, որ ունենք Սահմանադրության մեջ նկարագրված ՍԴ, բայց նման դատարան ունենալ չենք կարող առնվազն մինչև 2035 թվականը. «Քանի որ Հրայր Թովմասյանը եղել է Սահմանադրության տեքստի հեղինակը, այնպես է գրել այդ տեքստը՝ Գագիկ Հարությունյանի և Սերժ Սարգսյանի հետ համաձայնեցված, որ ինքը մինչև 2035 թվականը մնա ՍԴ նախագահ: Հրայր Թովմասյանը Սերժ Սարգսյանի և Գագիկ Հարությունյանի օգնությամբ սեփականաշնորհել է ՍԴ-ն, այնպես, ինչպես կարելի է նոտարական գրասենյակ բռնել և սեփականաշնորհել»,- նշեց Փաշինյանը:

Վարչապետը հայտարարեց, որ 2019 թվականի Հայաստանը պետք է ունենա 2019 թվականի Սահմանադրական դատարան. «ՍԴ-ն սեփականաշնորհված «բուդկայի» կարգավիճակից պետք է դուրս գա, սա իմ քաղաքական գնահատականն է»: