Քաղաքականություն
17.07.2019 | 19:30Երեկ հայտնի դարձավ, որ Հանրային հեռուստառադիոընկերության խորհրդի նախագահի խորհրդականի պաշտոնից հրաժարական է ներկայացրել Տիգրան Պասկևիչյանը։ Այսօր նա բաց նամակ է հրապարակել ուղղված խորհրդի նախագահ Արա Շիրինյանին, որտեղ քննադատել է վերջինիս վերաբերմունքը Հանրային հեռուստաընկերության բարեփոխումների անհրաժեշտության հանդեպ։ Մասնավորապես պարոն Պասկևիչյանը գրել է․ «Առաջին իսկ օրվանից պնդել եմ, որ իրավիճակը փոխելու համար պետք է անել կտրուկ և արմատական քայլեր՝ դրանք սկսելով հեռուստաընկերության ղեկավարին զբաղեցրած պաշտոնից ազատելով և ընտրություն նշանակելով, ինչի իրավունքն ունես»։ Պարոն Պասկևիչյանը նաև նկատել է, որ «հեղափոխությունից անցել է մոտ 15 ամիս, և հանրությունը դեռ չի տեսել նոր դեմքերի, չի հանդիպել նոր բովանդակության»։
Իշխանական պատգամավոր Արմեն Խաչատրյանը դրական է գնահատում Հանրային հեռուստաընկերության աշխատանքը: «Սակայն կարծում եմ անելիքներ շատ կան և դա հեռու է բավարար լինելուց»,- ասում է ԱԺ «Իմ քայլը» խմբակցության անդամ Արմեն Խաչատրյանը։
Պատգամավորը Հանրային հեռուստաընկերությունից միանգամից հեղափոխական փոփոխություններ չի սպասում։ Հեռուստաընկերությունը, ըստ նրա, դեռ երկար ճանապարհ ունի անցնելու իր կադրերին գտնելու համար։ Սակայն արդեն իսկ ամենագնահատելին առկա է։
«Հնարավորինս չեզոքություն է պահպանում Հանրային հեռուստաընկերությունը և օբյեկտիվ իրականություն է ներկայացնում»,- կարծում է իշխանական պատգամավորը։
ԲՀԿ-ական պատգամավոր Միքայել Մելքումյանն ավելի շատ Հանրայինի «Լուրերին» է հետևում, որոշակի տարբերություն տեսնում է նախորդ տարիների լրատվական քաղաքականության հետ համեմատած:
«Բայց, այնուամենայնիվ, քանի որ ես շատ մանրամասն եմ նայում հատկապես՝ խորհրդարանական քննարկումները, որոշակի տենդենց նկատում եմ: Պիտի ավելի անկեղծ լինեմ, իսկ ի՞նչ կա անկեղծ չլինելու, այնուամենայնիվ, որոշակի տենդենց նկատում եմ իշխանական թրենդը, իշխանական մոտեցումներն ավելի դրական լույսի ներքո ներկայացնելու, որ ես, կարծում եմ, իրանք չպետք է շեղվեն նորմայից»,- ասում է ԱԺ ԲՀԿ խմբակցության անդամ Միքայել Մելքումյանը։
Հեղափոխությունից անմիջապես հետո պարոն Մելքումյանը Հանրային հեռուստաընկերությունում ավելի չեզոք լրատվական թողարկումներ էր տեսնում, հիմա կրկին մի քիչ շեղում կա դեպի իշխանությունների գովքը․ «Հիշու՞մ եք, միշտ ասվել ա պառլամենտում, որ մենք ուզում ենք ապրել էն ժամանակվա «Հայլուրի» ներկայացրած Հայաստանում, այսինքն, որ ճիշտ չի արտահայտում»։
Պատգամավորը պնդում է, որ Հանրայինը չպետք է շեղվի ճշմարտությունից և չփորձի գնահատականներ տալ։
«Մենք պետք ա հասկանանք՝ օրինակ, «Լուրերի» վարողները մեկնաբաննե՞ր են, թե դիկտորներ, ներկայացնելը մի բան է, քաղաքական մեկնաբանություն անելը այլ բան է, այսինքն, իրենք իրենց պետք է մեկնաբանե՞ն, իրենց կարծի՞քը պիտի ասեն, թե ուղղակի պետք է տան նեյտրալ վիճակը։ Ես կարծում եմ քաղաքական հաղորդումներով պետք է գնան մեկնաբանությունները, բայց «Լուրերի» ժամանակ, այնուամենայնիվ, մեկնաբանություններ տալը պետք է չափավոր լինի, որպեսզի տենդենցիոզ չմեկնաբանվի»,- զգուշացնում է Միքայել Մելքումյանը։
Պատգամավորը սպասում է, որ Հանրայինը պետք է ձևակերպի մեր ազգային և պետական գերակա արժեքները և սկսի քարոզել դրանք։ Ի դեպ, պատգամավորները տեղյակ չէին այս օրերին Հանրային հեռուստաընկերությունում ծավալվող հակամարտությանը, որի արդյունքում հրաժարականի դիմում ներկայացրեց Հանրային հեռուստառադիոընկերության խորհրդի նախագահի խորհրդական Տիգրան Պասկևիչյանը։
Մանրամասները՝ տեսանյութում:
Մհեր Արշակյան
