Վանաձորի ՔԿԱԳ-ում առաջին անգամ դրական ցուցանիշներ են գրանցվել

2018 թվականի հունվարի 1-ից մինչև հունիսի 30-ն ընկած ժամանակահատվածում, ԱՆ Քաղաքացիական կացության ակտերի գրանցման (ՔԿԱԳ) Վանաձորի տարածքային բաժնում գրանցված ցուցանիշներն ուրախացնող են: Ի տարբերություն նախորդ տարիների՝ այս տարվա առաջին կիսամյակում արձանագրվել է ծնունդների ու ամուսնությունների աճ, միաժամանակ, նվազել են ամուսնալուծություններն ու մահերը:

«2018 թվականին տարածքային բաժնում գրանցվել է 485 ծնունդ, այս տարի՝ 542: Ավելացել են նաև ամուսնության ակտերը, այս տարի՝ 253, իսկ նախորդ տարի՝ 230: 2019 թվականին գրանցվել է 78 ամուսնալուծություն, իսկ 2018 թվականին՝ 95: Նվազել են նաև մահերը. 2018-ին մեզ մոտ գրանցվել է 625 մահ, իսկ այս տարի՝ 610: Սա, թերևս, առաջին անգամ է, որ բոլոր առումներով այսպիսի դրական ցուցանիշ ունենք, ինչը, իհարկե, ուրախալի է»,- ասաց Վանաձորի ՔԿԱԳ տարածքային բաժնի պետ Հասմիկ Այվազյանը:

Նա նշեց, որ նույնը չի կարելի ասել կառույցի հաստիքների ավելացման հետ կապված խնդրով: Արդեն մի քանի տարի է՝ հաստիքների ավելացման հարցով դիմում են նախարարություն, սակայն դրական պատասխան չեն ստանում. «Այս տարի էլ քաղաքապետի օգնությամբ դիմեցինք, որպեսզի մեկ հաստիք ավելացնեն, և կրկին սպասում ենք պատասխանի: Դա մեր ամենացավոտ ու արդիական հարցն էս»:

Այս պահին ՔԿԱԳ տարածքային բաժինը 3 աշխատակից ունի՝ ներառյալ բաժնի պետը: Ներկայում արդարադատության նախարարի առաջարկով Կառավարությունում քննարկումներ են անցկացվում, մինչև տարեվերջ փոփոխություններ են սպասվում:

«Նախատեսվում է օրենքի մեջ փոփոխություն մտցնել, որ քաղաքացիներն իրավունք ունենան դիմելու ցանկացած ՔԿԱԳ բաժին՝ անկախ բնակության վայրից, կարողանան էլեկտրոնային բազայի օգնությամբ օգտվել այդ տարածքային բաժնից: Որպեսզի բնակիչը չգնա ինչ-որ բաժին և նրան մերժեն՝ ուղղորդելով իրենց տարածք: Եվ նման այլ փոփոխություններ են նախատեսվում մինչև տարեվերջ»,- ասաց բաժնի պետը:

Տաթևիկ Ղազարյան