ՀՀԿ-ին անիմաստ տեղը հերոս մի դարձրեք. Մարուքյանը՝ Վենետիկի հանձնաժողովի վրա ՀՀԿ-ի ազդեցության մասին. ՏԵՍԱՆՅՈՒԹ

ԱԺ «Լուսավոր Հայաստան» խմբակցության ղեկավար Էդմոն Մարուքյանը ֆեյսբուքյան ուղիղ եթերով անդրադարձել է Վենետիկի հանձնաժողովի արձանագրությանը, դրա շուրջ ծավալվող քննարկումներին, ինչպես նաև վեթինգին:

«Իրավաբանները նորից բաժանվել են երկու մասի: Մի մասն ասում է՝ ով է Վենետիկի հանձնաժողովը, որ մեզ բան ասի, մյուս մասն ասում է՝ հանձնաժողովը նման բան չի ասել: Իշխանամերձ փորձագետները պնդում են, որ այ՝ Հանրապետականներն են այնպես արել, որ Վենետիկի հանձնաժողովը մեր դեմ խոսի»,- նշել է Մարուքյանը՝ հավելելով, որ Վենետիկի հանձնաժողովի և նմանատիպ կառույցների վրա ազդել հնարավոր չէ:

Ըստ Էդմոն Մարուքյանի՝ Վենետիկի հանձնաժողովը պարզապես արձանագրում է այն, ինչ տեղի է ունենում երկրում. «Երբ Հայաստանում որոշակի գործողություններ են տեղի ունեցել դատական իշխանության հետ կապված, օրինակ՝ դատարանների մուտքերի արգելափակում, այլ պրոցեսներ, մենք դրա մասին բարձրաձայնել ենք, և այն, ինչ չի համապատասխանում իրավունքի գերակայության չափանիշներին, ասել ենք, որ սա սխալ է: Երբ մենք չափանիշները չենք պահպանում, մենք սխալներ ենք թույլ տալիս, ոչ մի հանրապետական, ոչ մի կուսակցություն, որևէ մեկը ազդեցություն չունի Վենետիկի հանձնաժողովի և նմանատիպ կառույցների վրա: Մենք սխալ ենք անում, այդ հանձնաժողովն արձանագրում է մեր սխալը, մենք այնպիսի բան ենք անում, որը մտահոգիչ է, կառույցն ասում է, որ մտահոգիչ է: Վերջին գործողությունները եղել են մտահոգիչ, հանձնաժողովն ասել է, որ դրանք մտահոգիչ են»:

Մարուքյանը նաև կարծում է, որ հանձնաժողովի վերջին եզրակացության համատեքստում ՀՀԿ-ականները հերոսացվում են, ասվում է, թե նրանք «ինչ հզոր են և ազդել են Վենետիկի հանձնաժողովի վրա»:

«Դա ուղղակի աբսուրդ է: Պետք է ուղղակի սխալներ թույլ չտալ և որևէ մեկին չդարձնել անիմաստ հերոս, որ, իբր, ՀՀԿ-ականներն ազդում են Վենետիկի հանձնաժողովի վրա: Նման հեղինակավոր կառույցներն ազդեցություններից զերծ են»,- կարծում է Էդմոն Մարուքյանը:

Մանրամասները՝ տեսանյութում: