Տնտեսություն
10.07.2019 | 15:42
Արդեն երկու ժամ է՝ հանրապետության զգալի հատվածը զրկված է էլեկտրաէներգիայից, որոշ վայրերում այն մատակարարվում է խափանումներով: Փոխվարչապետ Տիգրան Ավինյանը ֆեյսբուքի իր էջում գրել էր, որ հոսանքազրկումը պայմանավորված է վթարով:
«Երևանի ՋԷԿ-ը և Հրազդանի 5-րդ բլոկն անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի»,- գրել է փոխվարչապետը։
Այժմ իրավիճակն անորոշ է, հայտնի չէ թե ինչն է հոսանքազրկման պատճատը և երբ այն կվերականգնվի:
«Հայաստանի էլեկտրական ցանցեր» ՓԲԸ-ից Factor.am-ին փոխանցեցին, որ պատասխանատվությունը ոչ թե իրենք են կրում, այլ «Բարձրավոլտ էլեկտրական ցանցերը» ՓԲԸ-ն, քանի որ ԲԷՑ-ն է վերաբաշխում էլեկտրաէներգիան: ԲԷՑ-ից, սակայն, մեզ տեղեկացրեցին, որ իրենք ևս պատասխանատու կողմ չեն, քանի որ խնդիրը «Երևանի ՋԷԿ»-ում և Հրազդանի 5-րդ բլոկում է:
Երկու կազմակերպություններից էլ առաջարկեցին տեղեկություններ ստանալ «ԷլեկտրաԷներգետիկական Համակարգի Օպերատոր» ՓԲԸ-ից: Իսկ այս կառույցից մեզ հայտնեցին, որ ընկերության ղեկավարը դեպքի վայրում է, որտեղ երկու ժամից ավելի է՝ փորձում են վերացնել վթարի հետևանքները: «ԷլեկտրաԷներգետիկական Համակարգի Օպերատոր»-ից նաև փոխանցեցին, որ միայն տնօրենի վերադարձից հետո պարզ կլինի, թե ինչն է վթարի պատճառը և երբ էլեկտրաէներգիայի մատակարարումն անխափան կվերսկսվի:
Նարեկ Կիրակոսյան
