15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Նիկոլ Փաշինյանը և Դոնալդ Տուսկը քննարկել են վիզաների ազատականացման հարցը. ՏԵՍԱՆՅՈՒԹ
Քաղաքականություն
10.07.2019 | 13:36
ՀՀ վարչապետ Նիկոլ Փաշինյանն ու Եվրոպական խորհրդի նախագահ Դոնալդ Տուսկը քննարկել են վիզաների ազատականացման հարցը: Այս մասին Կառավարությունում Դոնալդ Տուսկի հետ հրավիրված համատեղ մամուլի ասուլիսում ասաց Նիկոլ Փաշինյանը:
«Երկուստեք նշվեց Հայաստան-ԵՄ համապարփակ և ընդլայնված գործընկերության մասին համաձայնագրի մեծ նշանակությունը և եվրոպական երկրների կողմից այն շուտափույթ վավերացնելու կարևորությունը։ Տվյալ պայմանագիրը մի գործիք է, որի իրականացումը ոչ միայն նպաստելու է ՀՀ-ԵՄ հարաբերությունների զարգացմանը, այլ նաև օգնելու է Հայաստանի իշխանությունների՝ բարեփոխման օրակարգի իրականացմանը: Անդրադարձանք նաև ՀՀ-ԵՄ մուտքի արտոնագրերի ազատականացման վերաբերյալ երկխոսություն սկսելու խնդրին։ Իմ կողմից նշվեց Հայաստանի շահագրգռությունն այս հարցում, հատկապես միջանձնային շփումների ընդլայնված անհրաժեշտության տեսանկյունից»,- ասաց ՀՀ վարչապետը։
Նիկոլ Փաշինյանը նշեց, որ Տուսկի հետ հանդիպման ժամանակ վերահաստատել է օրենքի գերակայության և ժողովրդավարության ամրապնդման, ինչպես նաև կոռուպցիայի դեմ պայքարի՝ Հայաստանի իշխանությունների որդեգրած հանձնառությունը:
Վարչապետը տեղեկացրեց, որ հանդիպման ընթացքում խոսել է Հայաստանում իրականացվող բարեփոխումների մասին՝ հիշատակելով անկախ դատաիրավական համակարգ կառուցելու ուղղությամբ Կառավարության գործադրած ջանքերը։
«Ընդգծեցի, որ այդ առումով Հայաստանը մեծապես կարևորում է եվրոպական հաստատությունների, այդ թվում՝ ԵՄ-ի աջակցությունը, և հայտնում է իր երախտագիտությունը ցուցաբերվող օժանդակության և գաղափարական զորակցության համար»,- ասաց վարչապետը։
Մանրամասները՝ տեսանյութում:
Նարեկ Կիրակոսյան
