21.12.2025 | 11:11
«Ինտերը», «Յուվենտուսը» և «Նապոլին» հետևում են Սպերցյանի խաղին․ գործակալ
ՀՀ-ԵՄ համաձայնագիրը հավակնոտ է, կշարունակենք տեխնիկական և ֆինանսական օժանդակություն տրամադրել. Դոնալդ Տուսկ. ՏԵՍԱՆՅՈՒԹ
Քաղաքականություն
10.07.2019 | 13:33
Եվրոպական խորհրդի նախագահ Դոնալդ Տուսկը Հայաստան-ԵՄ համաձայնագիրը հավակնոտ է համարում: ՀՀ վարչապետ Նիկոլ Փաշինյանի հետ հրավիրված համատեղ ասուլիսում նա շեշտեց, որ Հայաստանի դրական դինամիկան նոր հնարավորություններ է ստեղծել համագործակցության համար:
«Իմ այցելությունն ապացույցն է այն կարևորության, որ Եվրամիությունը վերագրում է Հայաստանի և տարածաշրջանի հետ մեր հարաբերություններին։ Այսօրվա քննարկումներն ընդգծեցին մեր գործընկերության համաձայնագրի արդյունավետ իրականացումը։ Սա հավակնոտ համաձայնագիր է, որը սատարում է Հայաստանի արդիականացմանը։ Եվրամիությունն այս համաձայնագրի իրականացման ուղղությամբ կշարունակի տեխնիկական և ֆինանսական օժանդակություն տրամադրել»,- նշեց Դոնալդ Տուսկը։
Նրա խոսքով՝ ինքը և ՀՀ վարչապետը համակարծիք են օրենքի գերիշխանության, կոռուպցիայի դեմ պայքարի և մարդու իրավուքնների հանդեպ հարգանքի հարցերում. «Եվրամիությունը ողջունում է անկախ, արդյունավետ և հաշվետու դատական համակարգ ստեղծելու մղումը։ Կուռ դատական համակարգն էական բաղադրիչ է հասուն ժողովրդավարության և տնտեսական ու սոցիալական զարգացման համար»:
Ըստ Դոնալդ Տուսկի՝ Եվրամիությունը շարունակելու է այս բնագավառում փորձագիտական օժանդակությամբ օգտակար լինել Հայաստանին։
«Մենք քննարկեցինք նաև մասնագիտացված հակակոռուպցիոն հանձնաժողովի ստեղծման հարցը։ Ընդունելով բարեփոխումների ուղղությամբ ՀՀ Կառավարության ջանքերը՝ Եվրամիությունը 2019 թվականի համար գրեթե կրկնապատկել է օժանդակությունը Հայաստանին։ Այս միջոցները կօգնեն գերակա ծրագրեր իրականացնել՝ ներառյալ ենթակառուցվածքային և բնապահպանական»,- ասաց նա:
Մանրամասները՝ տեսանյութում:
Նարեկ Կիրակոսյան
