16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Երևանի շտապօգնության բրիգադների թիվն առաջիկայում կավելանա. Թագուհի Ստեփանյանն ամփոփել է 2019-ի առաջին կիսամյակը
Հասարակություն
09.07.2019 | 18:59
2019 թվականի հունվարի 1-ից մինչև հունիսի 30-ը Երևանի շտապօգնության ծառայությունը սպասարկել է 130.545 կանչ: 2018 թվականի նույն ժամանակահատվածի համեմատ՝ այս ցուցանիշը 7.761 կանչով ավելի է: Այսօր ամփոփելով 2019 թվականի առաջին կիսամյակը՝ այս մասին «Շտապօգնություն» ՓԲԸ տնօրեն Թագուհի Ստեփանյանը:
Ըստ նրա՝ ամսական կտրվածքով՝ կանչերի առավելագույն թիվը գրանցվել է հունվարին. տարվա առաջին ամսում ծառայությունը սպասարկել է 25.585 կանչ: Ամենաքիչ կանչերի թիվը գրանցվել է հունիսին՝ 19.838 կանչ։
«Շտապօգնության հիմնական կանչերը կապված են սիրտ-անոթային, սուր շնչառական հիվանդությունների, ինչպես նաև վնասվածքների հետ»,- հավելեց նա:
Թագուհի Ստեփանյանը, միաժամանակ, նշեց, որ 2018 թվականի համեմատ՝ սիրտ-անոթային հիվանդությունների հետ կապված կանչերը 5.087-ով նվազել են: Այս տարվա առաջին վեց ամիսներին գրանցված կանչերի արդյունքում հիվանդանոց է տեղափոխվել 28.966 հիվանդ. նախորդ տարվա համեմատ սա 2.692-ով ավելի է:
«Մանկական կանչերի թիվը եղել է 13.697: Այս դեպքում էլ հիվանդանոց է տեղափոխվել 5.175 երեխա: Եթե համեմատենք նախորդ տարվա հետ՝ 452 կանչով ավելի է, իսկ հիվանդանոց տեղափոխված երեխաների թիվն ավելի է 423-ով»,- տեղեկացրեց Թագուհի Ստեփանյանը:
Երեխաների պարագայում կանչերն արձանագրվում են սուր շնչառական հիվանդությունների, ջերմության, վնասվածքների հետ կապված:
Անդրադառնալով «Շտապօգնություն» ՓԲԸ-ի պարկի մասին հարցին՝ Թագուհի Ստեփանյանը նշեց, որ ծառայության պարկը թարմացվել է:
«Մեզ տրամադրվել է 49 մեքենա, այսօր գծում աշխատում է 35 մեքենա, որին ավելանում է նաև մեկ հոգեբուժական և երկու ֆելդշերական բրիգադ: Բայց մոտ ժամանակներում՝ արդեն մեկ ամսից, մեր բրիդագները կավելանան, և քաղաքում կգործի 50 բրիգադ»,- ասաց նա։
Թագուհի Ստեփանյանը, միաժամանակ, նշեց, որ եթե բնակչությունը հասկանա, որ «Շտապօգնություն»-ը պետք է բնակչին սպասարկի միայն անհետաձգելի դեպքերում, իրենց աշխատանքն այդքան ծանր չի լինի. «Բայց մենք կանչը մերժելու տարբերակ չունենք, պետք է անպայման սպասարկենք յուրաքանչյուր ստացված կանչ: Բայց բնակիչն էլ պետք է գիտակցի, թե որ դեպքում պետք է կանչել շտապօգնությունը: Մարդ պետք է հասկանա, որ շտապօգնությունն անհրաժեշտ է այն մարդկանց, ում կյանքին վտանգ է սպառնում»:
