Գրում են, որ ես այս ԱԺ-ի նոր Շմայսն եմ. Հայկ Սարգսյանը մանրամասնում է՝ ինչու է դատի տալիս ԶԼՄ-ներին. ՏԵՍԱՆՅՈՒԹ

ԱԺ «Իմ քայլը» խմբակցության պատգամավոր Հայկ Սարգսյանը լրատվամիջոցներում հրապարակված վեց հոդվածների առթիվ դիմել է դատարան՝ զրպարտության համար փոխհատուցման պահանջով: Այս մասին այսօր պատգամավորն ասաց ԱԺ-ում լրագրողների հետ հանդիպման ժամանակ:

«Ես վեց դեպքով դիմել եմ դատարան՝ լրատվամիջոցներից պահանջելով ինձ զրպարտելու համար վնասի փոխհատուցում: Մի քանի հարյուրավոր նման դեպքեր կային, որոնցով արժեր դիմել դատարան: Բայց վերջերս եմ սկսել նման միտք ունենալ, որովհետև մինչ այս մտածել եմ, որ սա ուղղորդված չէ ու ժամանակի հետ կանցնի, չեմ ուզել կրքերը թեժացնելու համար դիմել դատարան, բայց տեսնելով, որ այլ տարբերակ չկա, դիմել եմ»,- ասաց նա:

Պատգամավորը ներկայացրեց, թե հատկապես որ հրապարակումների համար է դիմել դատարան: «Առաջինը՝ Newspress.am կայքի «Թե ո՞վ է Հայկ Սարգսյանին նվիրել թանկարժեք մեքենա և ինչի՞ համար» հոդվածն է, որում պնդում են, թե ես «Գուդվին» ընկերության շահերը պաշտպանելու համար 150 հազար դոլար արժողությամբ նվեր եմ ստացել: Երկրորդը՝ նույն կայքի «Հերթական թանկարժեք նվերը՝ 20 մլն դրամ արժողությամբ հեռախոսահամար Հայկ Սարգսյանին» նյութի համար է: Երրորդ և չորրորդ հրապարակումները «Հրապարակ» օրաթերթի հոդվածների դեմ են՝ «Խորհրդարանում նոր Շմայս է հայտնվել» խորագրով հոդվածի և «Պատգամավոր Հայկ Սարգսյանը «դեբոշ» է սարքել Երևան-Մոսկվա ինքնաթիռում» վերնագրով հոդվածի համար: Հինգերորդ հրապարակումն «Իրավունք» թերթի «Դավիթ Սանասարյանի դեմ ողջ փաթեթն ԱԱԾ-ին է հասել Հայկ Սարգսյանի թեթև ձեռքով» հոդվածն է, որում նշվում է, թե Սանասարյանը հասել է իմ հոր կողմից նախկինում կատարած հանցագործություններին, դրա համար էլ ես նրա դեմ փաստաթղթեր եմ հավաքել: Դա կարող է հերքել և պետք է հերքի նախկին ՊՎԾ պետը: Վերջին հրապարակումը Antifake.am կայքինն է՝ «Արտոնյալ Զարեհ Սարգսյանը. Որտե՞ղ է ճանապարհային ոստիկանությունը»: Համաձայն հրապարակման՝ հայրս վարել է առանց պետհամարանիշերի մեքենա: Այդ մեքենան մեզ չի պատկանում և այդ հրապարակումը արատավորում է իմ ընտանիքի բարի համբավը», – ասաց Սարգսյանը:

Մանրամասները՝ տեսանյութում:

Նարեկ Կիրակոսյան