31.03.2025 | 08:55
Գյումրիում ոչ մի ուժ չի ստացել մեծամասնության քվեն
Ո՞վ է պատասխան տալու, եթե պարզվի՝ բնապահպանական վտանգն ուռճացված էր. Թունյանը՝ Ամուլսարի մասին. ՏԵՍԱՆՅՈՒԹ
Տնտեսություն
09.07.2019 | 12:31
«Իմ քայլը» խմբակցության պատգամավոր, տնտեսական հարցերի հանձնաժողովի նախագահ Բաբկեն Թունյանն ԱԺ արտահերթ նիստի ընթացքում շրջակա միջավայրի նախարարից հետաքրքրվեց, թե երբ պատրաստ կլինեն Ամուլսարի հանքավայրի հետ կապված փորձաքննության արդյունքները: «Մինչև մեր տեղեկությունն այն է, որ փորձաքննությունն ավարտվել է և հիմա փաստաթուղթը թարգմանում են: Ուզում եմ հասկանալ՝ ինչո՞վ է պայմանավորված այդ երկար թարգմանությունը և, ի վերջո, մենք ե՞րբ կիմանանք, թե Ամուլսարի հանքավայրի հետ կապված բնապահպանական ռիսկերը որքանով են ուռճացված կամ իրատեսական»,- հարցրեց Բաբկեն Թունյանը:
Ի պատասխան՝ Էրիկ Գրիգորյանն ասաց, որ փորձաքննությունը քրեական գործի շրջանակում է արվել, և Շրջակա միջավայրի նախարարության կողմից տրամադրված փորձաքննական գործընթացների հետ չի առնչվում: «Տեղեկությունը Քննչական կոմիտեից պետք է վերցնել»,- ասաց նա:
Բաբկեն Թունյանը հակադարձեց՝ Քննչական կոմիտեի մասով հարցը տեխնիկական բնույթ ունի, իսկ բովանդակային առումով հասցեատերը Շրջակա միջավայրի նախարարությունն է:
«Մենք ուզում ենք պարզել, թե այդ կազմակերպությունը բնությանն անթույլատրելի վնաս պատճառո՞ւմ է, թե՞ ոչ: Եվ ես, որպես տնտեսագետ, ավելի շատ տնտեսական շահերի մասին եմ մտածում, ինձ հետաքրքիր է՝ այս մի տարվա հետաձգումը տնտեսության վրա ունեցած բացասական ազդեցությամբ որքանո՞վ է համադրելի այդ բնապահպանական վտանգի հետ: Եվ եթե վերջում պարզվի, որ այդ բնապահպանական վտանգն ընդհանրապես չկար կամ ուռճացված էր, այս ամենի համար որևէ մեկը պատասխան տալո՞ւ է, թե՞ ոչ»,- հավելեց Բաբկեն Թունյանը:
Մանրամասները՝ տեսանյութում:
