13.12.2024 | 18:30
Կրասնոդարում դպրոցականների վրա դանակով հարձակված ՀՀ քաղաքացի դեռահասի ծնողները կվտարվեն ՌԴ-ից
Կառավարությունը 4 մլրդ 87 մլն դրամ տրամադրեց՝ Ջրօգտագործողների ընկերության կուտակած պարտքերի համար
Տնտեսություն
04.07.2019 | 14:03
Ջրօգտագործողների ընկերության՝ դեռևս անցած տարիներից կուտակած պարտքից զատ՝ 2018 թվականի ընթացքում կուտակված պարտքերը կազմել են 6 միլիարդ 941 միլիոն դրամ՝ «Ամերիաբանկ»-ի վարկի տեսքով: Այս մասին Կառավարության այսօրվա նիստին հայտարարեց տարածքային կառավարման և ենթակառուցվածքների նախարար Սուրեն Պապիկյանը:
Նա ներկայացրեց նախագիծ, որով առաջարկվում էր գումար հատկացնել ՀՀ Ջրային պետական կոմիտեին։ Նախարարն ասաց՝ տարիներ շարունակ Ջրօգտագործողների ընկերությունները տարեվերջին ՀԷՑ-ին պարտքը մարելու համար դիմել են բանկերին ու ստացած գումարը մյուս տարվա ստացած դոտացիայով փորձել են փոխհատուցել ու ամեն տարվա մեկնարկին համակարգը մարել է նախորդ տարվա պարտքը։
Սուրեն Պապիկյանն ասաց, որ Կառավարությունը, գոնե վերջին տարիների համար, նախադեպ չունեցող քայլ է կատարում. «Առաջարկում ենք գումար տրամադրել համակարգին, և սա բերելու է նրան, որ աշնանը համակարգը մտնելու է նոր տարի՝ զրոյական պարտքով, սա պահանջում է հետևողական աշխատանք»:
Փոխվարչապետ Տիգրան Ավինյանն էլ ասաց, որ պետք է արձանագրել՝ կա համակարգային խնդիր։ «Ու ամենակարևոր հարցը, որ պետք է քննարկենք այս գումարները տրամադրելուց, այն է, թե վերջապես ե՞րբ ենք կարողանալու նստել ու քննարկել համակարգային ու խորքային փոփոխությունները»,- ասաց Ավինյանը։
ՀՀ գլխավոր դատախազ Արթուր Դավթյանն էլ նշեց, որ գործերը քննվում են, որպեսզի պատճառված վնասները վերականգնվեն։
Այսպիսով՝ Ջրային կոմիտեին 2019 թվականի պետական բյուջեով նախատեսված Կառավարության պահուստային ֆոնդից կհատկացվի 4 միլիարդ 87 միլիոն 871 հազար դրամ:
Նարեկ Կիրակոսյան
