Ի՞նչ կանեիք, եթե Ձեզ խուզարկեին դատարան մտնելիս. փաստաբանը՝ Փաստաբանների պալատի նախագահին

Փաստաբանների պալատի 184 անդամներ այսօր գործադուլ են անում՝ իրենց դժգոհությունը հայտնելով մասնագիտական գործունեության խոչընդոտման դեմ: Փաստաբանները «Կոնգրես» հյուրանոցում հավաք-քննարկում են անցկացնում, որին հրավիրված են նաև իրավապաշտպան հասարակական կազմակերպությունների և միջազգային կազմակերպությունների ներկայացուցիչներ: 

Ինչպես արդեն տեղեկացրել էինք, փաստաբանների հավաք-քննարկմանը ներկա է նաև Փաստաբանների պալատի նախագահ Արա Զոհրաբյանը: Քննարկմանը անակնկալ եկած Զոհրաբյանը ևս խոսք խնդրեց՝ հայտարարելով, որ փաստաբանների նկատմամբ ոչ թե խուզարկություն է կիրառվում դատարաններում և ՔԿՀ-ներում, այլ զննություն:

Փաստաբան Լուսինե Սահակյանը հակադարձեց՝ «պայուսակը ստիպելով բացելը ի՞նչ է, եթե ոչ խուզարկություն», ապա օգտվելով Զոհրաբյանին հարց ուղղելու հնարավորությունից հարցրեց, թե ինչ կաներ վերջինս, երբ իրեն խուզարկեին դատարան մուտք գործելիս: Զոհրաբյանը պատասխանեց, որ եթե զննությունը համարեր խուզարկություն, կդիմեր իրավապահ մարմիններին, և եթե իրավաչափ որոշում չլիներ համապատասխան մարմինների կողմից, հավաքագրած փաստեր կներկայացներ ՓԲ:

Լուսինե Սահակյանը հեգնեց. արդեն վաղուց ակնկալիքներ չունի այդ կառույցից և համոզված է, որ այն չի կարող «որևէ լավ բան անել փաստաբանների համար»:

Ժիրայր Սեֆիլյանի գործով պաշտպան Մուշեղ Շուշանյանը, որն էլ իր խոսքով խուզարկության է ենթարկվել նիստերի դահլիճում, հայտարարեց, թե այդ ամենը ՓԲ նախագահի ամենաթողության արդյունքում է: Զոհրաբյանն էլ հիշեցրեց, որ Շուշանյանի հետ կապված միջադեպից հետո անմիջապես զանգահարել է վերջինիս՝ փորձելով իրավիճակը ճշտել: Զոհրաբյանի ելույթի ժամանակ տեղից խոսում էր Արգիշտի Կիվիրյանր, ինչն առաջացրեց Զոհրաբյանի վրդովմունքը: «Ինչի՞ եք ծիծաղում, պարոն Կիվիրյան»,- ասաց նա:

Կիվիրյանն էլ հեգնեց, թե հնարավո՞ր է այստեղ էլ կարգապահական սանկցիա կիրառվի: «Այստեղ սանկցիաների խնդիր չկա»,- արձագանքեց ՓԲ նախագահը:

Այստեղ է նաև ՓԲ նախկին նախագահ Ռուբեն Սահակյանը, նա էլ անդրադարձավ «Սասնա ծռերի» գործով դատավոր Արտյուշա Գաբրիելյանին՝ ասելով, թե նրան «արդեն վաղուց պետք է փոխել»:

Սեդա Ղուկասյան