28.06.2026 | 05:30
ԱԱ-2026. Պորտուգալիան չհաղթեց Կոլումբիային ու փլեյ-օֆֆ դուրս եկավ երկրորդ տեղով. ՏԵՍԱՆՅՈՒԹ
Երեք շաբաթ՝ առանց աղբահանության. Մոլդովական 29/5-ում բողոքում են գարշահոտից ու առնետներից. ՏԵՍԱՆՅՈՒԹ
Հասարակություն
02.07.2019 | 20:21
Նոր Նորքի 2-րդ զանգվածի Մոլդովական 29/5 հասցեի բնակիչներն արդեն երեք շաբաթ է՝ գարշահոտ են շնչում: Պատճառը շենքի խցանված աղբատար խողովակն է, որի հետևանքով աղբը կուտակվել է ու բարձր ջերմաստիճանի պայմաններում սկսել նեխել:
«Առնետները մինչև ութերորդ հարկ բարձրանում են: Պատուհան բացել չի լինում, հոտը նույնիսկ սենյակների մեջ ա լցվում: Էլի հանրակացարան ա, բան չունենք ասելու, բայց կարելի ա, չէ՞ նենց անել, որ մենք էլ գոնե մեզ մարդ զգանք»,- նշեց շենքի բնակիչներից Ամալյա Մանուկյանը:
Բնակիչները բողոքում են, ոչ միայն գարշահոտից, այլ նաև առնետներից: Ասում են՝ վախենում են անգամ տանից դուրս գալ:
«Ես նոր եմ էստեղ գալիս բնակվելու, բայց ահավոր վիճակ ա: Մանավանդ՝ առնետները: Ես այս մեծ հասակիս վախենում եմ բարձրանալ, իմ երեխեքին չեմ թողնում, որ իջնեն բակում խաղան»,- ասաց բնակիչներից Օֆիկ Մելքումյանը:
Շենքում բնակվող երեխաները, չնայած վախենում են, բայց արդեն սովորել են խաղալիս առնետների հանդիպելուն։
«Վախենում ենք, մենք ենք սատկացնում առնետներին: Գնդակով խաղում ենք, գնդակն ընկնում ա աղբի մեջ, հանում, խաղում ենք: Վախենում ենք էստեղով քայլենք, բարձրանում են մեզ վրա առնետները: Գիշերը, որ քայլում ենք, լույս ենք անում ու առնետները ոտքներիս տակ են ընկնում, վախենալով սատկացնում ենք, չենք կարողանում խաղալ»,- նշեցին երեխաները:
Մոլդովական փողոցի 5-րդ շենքի բնակիչներն աղբահանության հարցով արդեն մի քանի անգամ դիմել են թե՛ թաղապետարան, թե՛ «Սանիթեք»:
Նոր Նորք վարչական շրջանի կոմունալ բաժնից մեզ տեղեկացրին, որ այս հարցը միայն «Սանիթեքի» իրավասության տակ է, և որ իրենք բազմիցս տեղեկացրել են բնակիչների բողոքի մասին:
«Սանիթեքի» հասարակայնության հետ կապերի պատասխանատու Քնարիկ Առաքելյանը Factor.am-ի հետ հեռախոսազրույցում ներկայացրեց պատճառը, թե ինչու տվյալ փողոցում աղբահանության հետ խնդիր կա:
Նրա խոսքով՝ ստեղծված իրավիճակը բնակիչների կողմից աղբատար խողովակի մեջ նետված շինարարական աղբի և «Սանիթեքի» աշխատակիցների կողմից դա չհեռացնելու հետևանքն է: Նախորդ անգամ, երբ աշխատակիցը շենքի աղբը հեռացրել է, միջադեպ է տեղի ունեցել: «Մեր աշխատակիցներն այդ աղբը հանել են և այդ ընթացքում բնակիչները մեծ աղմուկ են բարձրացրել, թե ինչու չեք տանում այդ շինարարական աղբը: Բնականաբար, բնակիչներին փորձել են բացատրել, որ մեր մեքենան չի կարող այդ աղբը տանել և այլ մեքենա կգա, դա նրանց լիազորությունների դաշտում է: Մեր աշխատակիցը վնասվածքներ է ստացել, այդ մասին քաջատեղյակ է Նոր Նորքի թաղապետարանը, Ոստիկանություն է եկել: Միջադեպից հետո մեր ոչ մի աշխատակից չի ուզում գնալ այնտեղ, որովհետև վախ կա, որ միջադեպը կկրկնվի»,- տեղեկացրեց Քնարիկ Առաքելյանը:
«Սանիթեքի» հասարակայնության հետ կապերի պատասխանատուն հավելեց, որ այս փուլում «Սանիթեքն» այլ մեկնաբանություն չունի: Նրա խոսքով՝ կազմակերպության սեփականատերը շուտով ասուլիսով հանդես կգա, որի ընթացքում էլ կանդրադառնա առկա խնդիրներին: Իսկ մինչ այդ, բոլոր հարկերն ու վարձավճարները բարեխիղճ կերպով մուծած Երևանի Մոլդովական 29/5 շենքի բնակիչները ստիպված կլինեն ապրել առնետներով լի գարշահոտ միջավայրում։
Նելլի Մելքոնյան
