28.06.2026 | 05:30
ԱԱ-2026. Պորտուգալիան չհաղթեց Կոլումբիային ու փլեյ-օֆֆ դուրս եկավ երկրորդ տեղով. ՏԵՍԱՆՅՈՒԹ
Ցավով եմ հետևում Սասուն Միքայելյանի և Ռոմանոս Պետրոսյանի հակամարտությանը. Արմեն Փամբուխչյան. ՏԵՍԱՆՅՈՒԹ
Քաղաքականություն
02.07.2019 | 20:45
Factor.am-ի հարցազրույցը ՀՀ ԱԺ «Իմ քայլը» խմբակցության պատգամավոր, ՔՊ վարչության անդամ Արմեն Փամբուխչյանի հետ
– Պարո՛ն Փամբուխչյան, հետևո՞ւմ եք Սասուն Միքայելյանի և Ռոմանոս Պետրոսյանի հեռակա բանավեճին։
– Հետևում եմ, ցավով եմ հետևում այդ հակամարտությանը, բայց «Քաղաքացիական պայմանագիրը» միշտ եղել է հրապարակային, և անգամ մեր առաջին կուսակցական հակամարտությունն է հրապարակային բնույթ կրում։ Չեմ ուզում որևէ կերպ մեկնաբանել, ճիշտ կլինի՝ կողմերը մեկնաբանեն։ Թե՛ դրական, թե՛ բացասական մեկնաբանություն կարող է խնդիր առաջացնել: Մեզ համար կարևոր է, որ խնդիրը գնա ոչ թե սրման, այլ լուծման։
– Դուք կամ վարչության այլ անդամներ փորձե՞լ եք խոսել նրանց հետ և խնդիրը հանրային քննարկման տիրույթից տեղափոխել ներկուսակցական քննարկումների դաշտ։
– Իհարկե: Մոտ ժամանակներս այդ խնդիրը լուծում կստանա, և մեր երկու ընկերները կգան ընդհանուր հայտարարի, և այս հակամարտությանը վերջ կդրվի։
– Բացառո՞ւմ եք, Սասուն Միքայելյանի և Ռոմանոս Պետրոսյանի միջև առկա տարաձայնությունները մարզում ազդեցությունը մեծացնելու հետ կապված լինեն: Գուցե Սասուն Միքայելյանն իսկապես ուզում է՝ իր որդին մարզպետ դառնա, ինչպես մամուլն է գրում:
– Սասուն Միքայելյանը հեղինակություն է ոչ միայն Կոտայքի մարզում, այլև Հայաստանում և Արցախում, ինքը չունի հեղինակության հաստատման խնդիր: Իսկ Ռոմանոս Պետրոսյանն ամենաաշխատող մարզպետներից մեկն է, և որպես մարզպետ՝ չունի հեղինակության խնդիր։ Կարևորն այն է, որ որևէ հակամարտություն չազդի Կոտայքի մարզի զարգացման վրա։ Այս հակամարտությունը նաև փորձություն է, որը մենք կհաղթահարենք։
– Պարոն Միքայելյանը նաև նշեց, որ եթե չսովորեք դասեր քաղել, ապա թավշյա հեղափոխությունը կդառնա թավշյա հեռացում։ Կա՞ նման վտանգ։
– Ես այլ կերպ կասեի՝ եթե մենք չիրականացնենք այն ամենը, ինչ խոստացել ենք մարդկանց, և շեղվենք մեր հիմնական կուրսից, այդ ժամանակ՝ չի բացառվում։ Եթե սկսենք այնպիսի սխալներ անել, ինչի համար ժողովուրդը պայքարել է նախորդ իշխանությունների դեմ, բնականաբար չի բացառվում: Բայց ես համոզված եմ՝ մենք նախորդների նման չենք լինի, հետևապես՝ ես դա բացառում եմ։
Հարցազրույցն ամբողջությամբ՝ տեսանյութում։
Շողիկ Գալստյան
