25.04.2026 | 20:19
ՃՏՊ Չարենցավան քաղաքի Չարենցի փողոցում․ կան տուժածներ
Արճիսը շուրջօրյա խմելու ջրով ապահովելու համար պետք է մոտ 35 մլն դրամ, առայժմ կառաջարկենք այլ լուծում․ Տավուշի մարզպետի օգնական
Հասարակություն
01.07.2019 | 16:43
Հուլիսի 1-ին առավոտյան 08։30-ից Տավուշի մարզի Արճիս համայնքի բնակիչները փակել էին Բագրատաշեն-Վանաձոր միջպետական ճանապարհը՝ պահանջելով պատկան մարմիններից լուծել գյուղի խմելու ջրի խնդիրը։
Բնակիչները պնդում էին, որ երկար ժամանակ է այս խնդիրը բարձրացնում են տարբեր գերատեսչություններում, սակայն միչ օրս այն մնում է չլուծված։ Տավուշի մարզպետի օգնական Մերուժան Հարությունյանը Factor.am-ի հետ զրույցում խնդրի վերաբերյալ նշեց, որ այսօր երեկոյան պատրաստվում է հանդիպել Արճիսի բնակիչների հետ, իսկ մինչ այդ արդեն երկխոսության արդյունքում Բագրատաշեն-Վանաձոր միջպետական ճանապարհը նրանք բացել են։
«Սա տարիների խնդիր է․ այո՛, գյուղը խմելու ջուր չունի, և մենք գործուն քայլեր ենք իրականացրել այս ուղղությամբ։ Գյուղը 24 ժամով խմելու ջրով ապահովելու վերաբերյալ նախագիծ է մշակվել, նախագծահաշվարկային աշխատանքներն ու չափագրումներն արդեն ավարտված են և այն ամփոփ տեքսով ներկայացրել ենք Կաավարությանը։ Նախագիծը դասվել է հրատապ ծրագրերի շարքին և Կառավարությունում այն արդեն իսկ անցել է քննարկման առաջին փուլը։ Սակայն պետք է նշեմ, որ Արճիս գյուղն ամբողջությամբ խմելու ջրով ապահովելու համար, ըստ նախնական հաշվարկների, անհրաժեշտ է 35 միլիոն դրամ, որը կփորձենք գտնել կա՛մ դոնորների, կա՛մ տվյալ համայքնից ՌԴ-ում ապրող համագյուղացիների միջոցով, իհարկե, երբ նախագիծը Կառավարությունն ամբողջությամբ հաստատի, որպես պետական ծրագիր, պետությունն էլ իր հատկացումը կանի»,- ասաց Տավուշի մարզպետի օգնականը՝ նշելով, որ հաշվի առնելով խնդրի հրատապությունը, նախքան Կառավարության կողմից ծրագրի վերջնական հաստատումն ու անհրաժշետ 35 միլիոն դրամի հայթայթումը, իրենք Արճիսի բնակիչներին կառաջարկեն խնդրի կարճաժամկետ լուծում։
«Արճիս համայնքում կա մի ջրամբար, որից իրենք շատ քիչ են օգտվում։ Հիմա կփորձենք այդ ջրամբարի մոտ տեղակայված ջրագծի վրա պոմպակայան տեղադրել և ջուր մղել ջրամբար և օրվա մեջ մի քանի ժամով գյուղին ջուր տալ։ Խնդրի լուծման այս տարբերակը կպահանջի մոտովորապես տասը օր, որից հետո ամռան այս ամիսներին Արճիսում օրվա ընթացքում գոնե մի քանի ժամով խմելու ջուր կլինի»,- ասաց Հարությունյանը։
Աղավնի Սուքիասյան
