06.08.2026 | 00:46
«Մուլտի գրուպ» կոնցեռնի նախկին տնօրեն Սեդրակ Առուստամյանը 2 ամսով կալանավորվեց
«Բացարձակապես սուտ է». Ստեփանակերտի քաղաքապետի խոսնակը՝ Սամվել Բաբայանի գրասենյակի հայտարարության մասին
Քաղաքականություն
01.07.2019 | 15:01
Ստեփանակերտի քաղաքապետ Սուրեն Գրիգորյանի մամուլի խոսնակ Դավիթ Միքայելյանը հերքում է տեղեկությունները, որ քաղաքապետի հրահանգով տեսախցիկ է տեղադրվել այն շենքի միջանցքում, որտեղ տեղի է ունենում Սամվել Բաբայանի նախաձեռնած ստորագրահավաքը:
«Բացարձակապես սուտ է, չկա այդպիսի բան: Նորմալ կազմակերպվում է ստորագրահավաքը: Մարդիկ ազատ, առանց կաշկանդվելու գնում են, իրենց իրավունքն է, ստորագրում են: Չկա այդպիսի բան, ես հերքում եմ»,- ասաց մամուլի խոսնակը:
Հիշեցնենք, որ Սամվել Բաբայանի գրասենյակը հունիսի 27-ին հայտարարություն էր տարածել, որի համաձայն՝ հունիսի 26-ի լույս 27-ի գիշերը Ստեփանակերտի Վազգեն Սարգսյան 25 հասցեում գտնվող շենքի միջանցքում, որտեղ ստորագրահավաք է անցկացվում, քաղաքապետ Սուրեն Գրիգորյանի հրահանգով տեսախցիկ է տեղադրվել՝ տեսագրող սարքով: Նախաձեռնող խումբը սա որակել էր ստորագրահավաքի գործընթացին խոչընդոտելու փորձ:
Մեր դիտարկմանը, որ Սամվել Բաբայանի գրասենյակը լուսանկար է հրապարակել, որը վկայում է տեսախցիկի առկայության մասին, խոսնակն ասաց. «Այդպիսի բան չկա, ինչպես կարելի է… ոչ մի կաշկանդող բան չկա: Կարող եք ցանկացած քաղաքացու հարցնել»:
Նշենք, որ ստորագրահավաքի նպատակը Արցախի Հանրապետության Սահմանադրության 48-րդ հոդվածի 2-րդ և 3-րդ կետերում փոփոխություն կատարելն է, որը ՀՀ քաղաքացիներին ևս հնարավորություն կընձեռի որպես թեկնածու առաջադրվել Արցախի Հանրապետության նախագահի և ԱԺ ընտրություններում:
Նարեկ Կիրակոսյան
