Ավտոմաքսատունը Գյումրի տեղափոխելու համար անհրաժեշտ է 20 մլն դոլար․ Դավիթ Անանյան. ՏԵՍԱՆՅՈՒԹ

Արդեն մեկնարկը տրվել է, բայց եթե ձեզ թվում է, որ դա պետք է լիներ մի քանի ամիսների ընթացքում, ապա այդպես չի լինում։ Այս մասին ասաց ՊԵԿ նախագահ Դավիթ Անանյանը՝ Գլխավոր դատախազությունում պատասխանելով Factor.am-ի հարցին, թե ինչ փուլում է ավտոմաքսատունը Գյումրի տեղափոխելու հարցը, քանի որ տպավորություն է, որ չի կատարվում վարչապետի հանձնարարականը:

«Իսկ ո՞վ է ասում, որ չի կատարվում։ Վարչապետը ձեր հարցի պատասխանը հնչեցրել է ԱԺ-ում, հարցին համապարփակ լուծում է տվել, և Գյումրիում կառուցվելու է արտաքին տնտեսական գործունեության սպասարկման համապարփակ կենտրոն, որը ոչ միայն իրականացնելու է ավտոմատաքսատան ֆունկցիան, այլ նաև ընդգրկուն գործարքներ։ Արդեն մեկնարկը տրվել է, բայց եթե ձեզ թվում է, որ դա պետք է լիներ մի քանի ամիսների ընթացքում, ապա այդպես չի լինում։ Դա կլինի տարիների ընթացքում»,- ասաց Անանյանը:

Հստակեցնող հարցին՝ այսինքն, Երևանում ավտոմաքսատուն չի՞ լինելու, ՊԵԿ նախագահն ասաց. «Ժամանակի ընթացքում մաքսային ձևակերպումները Երևան քաղաքից դուրս են գալու, և ունենալու ենք Հյուսիսային ու Հարավային տարածաշրջանային արտաքին տնտեսական գործունեության սպասարկման կենտրոններ, որոնք կիրականացնեն ոչ միայն մաքսային գործառույթ, այլ նաև արտաքին տնտեսական գործունեությանն առնչություն ունեցող պետական գործառույթները կենտրոնացվելու են մեկ տանիքի ներքո»։

Անանյանը նշեց, որ այդ կենտրոններից յուրաքանչյուրը հիմնելու համար, նախնական հաշվարկով, կտրամադրվի 19-21 մլն դոլար՝ վարկային և դրամաշնորհային միջոցների հաշվին:

ՊԵԿ նախագահը նաև տեղեկացրեց, որ ներկայիս Նորագավիթի ավտոմաքսատան շենքը պետությունը վարձակալում է։ Դավիթ Անանյանն ասաց՝ վարձակալվող շենքի սեփականատերը Սամվել Ալեքսանյանը չէ. «Կարծում եք, որ ես բոլոր վարձակալների պայմանագրերն անգիր հիշո՞ւմ եմ: Կարծեմ Շողերինն է՝ Սամվել Ալեքսանյանի կնոջը»:

Մանրամասները՝ տեսանյութում:

Նարեկ Կիրակոսյան