Երբ որևէ կողմ ցանկացել է՝ բանակցությունները մտնեն փակուղի, խոսել է խաղաղապահ ուժերից․ Թևան Պողոսյան. ՏԵՍԱՆՅՈՒԹ

Մինչ Հայաստանի և Ադրբեջանի ԱԳ նախարարների հանդիպումն էլ ակնհայտ էր՝ որևէ ակնկալիք չպետք է ունենալ: Factor.am-ի հետ զրույցում անդրադառնալով Մնացականյան-Մամեդյարով հանդիպմանն ու դրանց արդյունքներին՝ ասաց Մարդկային զարգացման միջազգային կենտրոնի նախագահ Թևան Պողոսյանը։

Հիշեցնենք, որ հունիսի 20-ին Վաշինգտոնում հադիպեցին Հայաստանի և Ադրբեջանի արտգործնախարարներ Զոհրաբ Մնացականյանն ու Էլմար Մամեդյարովը՝ ԵԱՀԿ Մինսկի խմբի համանախագահների հովանու ներքո։ Հանդիպումից հետո միջնորդները կողմերին կոչ են արել վերականգնել խաղաղությանը նպաստող մթնոլորտը։

«Ադրբեջանի համար դա հերթական անգամ ժամանակ ձգելու առիթ էր։ Իրենք ժամանակ են ձգում, ինչ-որ բաներ են ասում, բայց բոլոր քննարկումներն Ադրբեջանը օգտագործում է ի շահ նրա, որ ցույց տա՝ ինքը «պուպուշիկ է», սակայն իր քաղաքական որոշումները վաղուց է ընդունել, որ միակ մոտեցումը լինելու է ռազմական լուծումը։ Ադրբեջանը սպասում է ճիշտ ժամանակին, երբ կզգա՝ հայ ազգի միասնությունն այն չի, ինքը տնտեսապես ուժեղ է, իսկ միջազգային իրավիճակն էլ թույլ է տալիս, որ գործողություններ անի»,- նշեց Պողոսյանը:

Զոհրաբ Մնացականյանից հետ հանդիպումից հետո Մամեդյարովը խոսել էր տարածաշրջանում խաղաղապահ ուժերի տեղակայման մասին։ Թևան Պողոսյանն ասաց՝ մշտապես, երբ որևէ կողմ ցանկացել է՝ բանակցությունները մտնեն փակուղի, բարձրաձայնել է խաղաղապահ ուժերի մասին։

«Ամենակարևոր հարցերից մեկն է, թե ի՞նչ մանդատով են գալու խաղաղապահ ուժերը, լավագույն օրինակները կան աշխարհում, որոնք ուսանելի են, այսինքն՝ մանդատը շատ կարևոր է. եթե ինչ-որ բան լինի, ո՞նց են արձագանքելու»,- շարունակեց Պողոսյանը։

Մանրամասները՝ տեսանյութում։