Շիրակում տեղացած հերթական կարկուտն ավերել է ցանքատարածություններն ու տնամերձ այգիները. ԼՈՒՍԱՆԿԱՐՆԵՐ

Շիրակի մարզում դեռ չէին հասցրել հաշվել հունիսի 24-ին տեղացած կարկուտի վնասները, երբ նորը եկավ: Նախօրեին ավելի քան 20 րոպե տեղացած հերթական կարկուտն ու քամին մեծ վնասներ են հասցրել Ամասիայի, Աշոցքի և Ախուրյանի տարածաշրջանի գյուղերին՝ ավերելով ցանքատարածություններն ու տնամերձ այգիները։

Մասնավորապես, կարկուտը մեծ վնասներ է հասցրել  Ամասիա, Բանդիվան, Հովտուն և Ջրաձոր գյուղերին: Ի դեպ՝ նշված գյուղերում հակակարկտային կայաններ չկան:

«Հիմնականում կարկտահարվել են ցանքատարածությունները, բնակչության տնամերձերն ամբողջությամբ: Բանդիվանում նաև անասուննրին է վնաս եղել, հատկապես գառներին՝ անկումներ են եղել։ Տների տանիքներ են վնասել, ապակիներ են կոտրվել։ Կարկուտի հատիկներն էլ առավել նման էին սառցաբեկորների։ Այդպիսի աղետալի վնասներ են եղել։ Սա արդեն երկրորդ կարկուտն է մեզ մոտ։ Նախկինում 80% էր կարկտահարությունը, բայց հիմա ծառերին մնացել են միայն ճյուղերը, տերևներն էլ են թափվել»,- Factor.am-ի հետ զրույցում ասաց Ամասիա համայնքի ղեկավար Ջեմմա Հարությունյանը։

Ախուրյանի տարածաշրջանում էլ հիմնականում տուժել են Կառնուտ, Հովիտ, Բասեն, Ջրառատ, Ախուրյան գյուղերը։

«Կարկուտից վնասվել են բոլոր ցանքատարածությունները՝ հացահատիկ, գարի,  բանջարաբոստանային կուլտուրաները՝ կարտոֆիլ, գազար, ճակնդեղ։ Տնամերձ հողամասերում, այգիներում մրգատու ծառերն են վնասվել: Մի 2 օր առաջ էլ Այգաբաց գյուղում էր ուժեղ կարկուտ տեղացել ու վնասներ հասցրել»,- ասաց Ախուրյանի համայնքապետ Արծրունի Իգիթյանը։

Վնասների չափի վերաբերյալ տվյալներ դեռ չկան։ Այս պահին կարկուտից տուժած համայնքներում աշխատում են մարզպետարանի հատուկ հանձնաժողովները, ուսումնասիրում են վնասները։

Նշենք, որ հունիսի ընթացքում սա արդեն երրորդ կարկտահարությունն է Շիրակի մարզում։

Էմմա Չոբանյան