29.03.2026 | 22:16
Հրդեհ ավտոմեքենայում․ տուժածներ չկան
«Լեզվի կոմիտեն փորձելու է իր նոր դիմագիծը ստեղծել». Դավիթ Գյուրջինյան. ՏԵՍԱՆՅՈՒԹ
Հասարակություն
26.06.2019 | 14:55
Ժամանակի պահանջին համապատասխան՝ Լեզվի կոմիտեն փորձելու է թվային տիրույթում ավելի մեծ ներկայացվածություն ապահովել։ Այս մասին այսօր հրավիրված ասուլիսի ընթացքում նշեց Լեզվի կոմիտեի նախագահ Դավիթ Գյուրջինյանը։
«Լեզվի կոմիտեն փորձում է ստեղծել իր դիմագիծը։ Արդեն ստեղծվել է կոմիտեի տարբերանշանը։ Մեր նպատակը հստակ է․ անել ամեն ինչ, որպեսզի Հայաստանում հայերենը պահպանի իր գերակա դիրքերը»,- նշեց Դավիթ Գյուրջինյանը։
Նրա խոսքով՝ փետրվարից մշակում են նաև Լեզվի կոմիտեի պաշտոնական կայքը, որը հուլիսին արդեն պատրաստ կլինի։ Այն հասանելի կլինի langcom.am և լեզվիկոմիտե․հայ հասցեներով և կծառայի որպես կոմիտեի պաշտոնական լրատու և լեզվական հարթակ՝ հագեցած տարատեսակ նյութերով և խաղերով։
«Կայքից բացի, նաև յութուբյան էջն ենք ակտիվացնելու, տեսանյութեր ու հաղորդաշարեր տեղադրելու։ Նաև թվիթերյան հաշիվ ենք ստեղծել՝ @LangComArmenia»,- նշեց Դավիթ Գյուրջինյանը։
Կոմիտեի ղեկավարը նշեց, որ այս պահին կարևորում են վերահսկողությունն ուղղված «Լեզվի մասին» ՀՀ օրենքի պահանջների կատարմանը։ 2019-ի փետրվարից Լեզվի կոմիտեն իրավախախտման 22 վարույթ է ներկայացրել, որոնք այս պահին ընթացքի մեջ են։
Անդրադառնալով նաև կոմիտեի տարածած հորդորակներին, Գյուրջինյանը հավելեց, որ 2019-ի առաջին կիսամյակում լրատմավիրջոցներին, տեղական ինքնակառավարման և պետական մարմիններին երկու տասնյակից ավելի հորդորակ է ուղարկվել։ Բացի այդ, ակտիվ է կապը քաղաքացիների հետ․ այս ընթացքում արդեն 160 գրավոր դիմում և շուրջ 200 հեռախոսազանգ են ունեցել։
Մանրամասները՝ տեսանյութում:
Նելլի Մելքոնյան
