ՍԴ-ն այսքան ժամանակ ոչ լեգիտիմ է գործել. Աննա Կարապետյան. ՏԵՍԱՆՅՈՒԹ

Ազգային ժողովի «Իմ քայլը» խմբակցության պատգամավոր, պետաիրավական հարցերի մշտական հանձնաժողովի նախագահի տեղակալ Աննա Կարապետյանի համար Սահմանադրական դատարանի նորընտիր դատավոր Վահե Գրիգորյանի հայտարարությունն անակնկալ է եղել: Հիշեցնենք, որ Վահե Գրիգորյանն ԱԺ-ում հայտարարել էր, որ ՍԴ գնում է՝ նախագահի պարտականությունները ստանձնելու համար:

«Ես այդ պահին դահլիճում չեմ եղել, բայց որ հետո լսեցի, անակնկալ էր: Խմբակցությունում չի քննարկվել, որ նա նման ելույթ պետք է ունենա»,- ասաց նա:

Աննա Կարապետյանը նշեց, որ անցումային դրույթները՝ ՍԴ անդամից անցում ՍԴ դատավորի, բացակայում են: Պատգամավորը լուծումներ ունի, որոնք առաջիկայում կներկայացնի: Կարապետյանը, միաժամանակ, չցանկացավ մեկնաբանել իր գործընկեր Նիկոլայ Բաղդասարյանի հայտարարությունը, թե ոստիկանները Հրայր Թովմասյանին չպետք է թույլ տան, որ ՍԴ շենք մտնի:

Մեր դիտարկմանը, որ որոշ մասնագետներ պնդում են, թե Սահմանադրության 213-րդ հոդվածն ապահովում է այն անցումային դրույթները, որ ՍԴ գործող նախագահը շարունակի պաշտոնավարել, Աննա Կարապետյանը պնդեց, որ այդ հոդվածը նման լիազորություններ չի տալիս: Նշենք, որ 213 հոդվածի համաձայն՝ ՍԴ նախագահը շարունակում է պաշտոնավարել մինչև իր լիազորությունների՝ 2005 թվականի փոփոխություններով Սահմանադրությամբ սահմանված ժամկետի ավարտը:

Հարցին էլ՝ ՍԴ-ն այսքան ժամանակ ապօրինի՞ է գործել, պատգամավորը պատասխանեց. «Ոչ լեգիտիմ»:

Մանրամասները՝ տեսանյութում:

Նարեկ Կիրակոսյան