05.03.2026 | 17:10
Քննարկվել են պաշտպանության ոլորտում Հայաստան-Ֆրանսիա համագործակցության ընթացքին և զարգացման հեռանկարներին առնչվող հարցեր
Անգիր անելու տարբերակով են գիտելիք ստանում․ Լավրենտի Միրզոյանը՝ հայոց լեզվի և գրականության միասնական քննության արդյունքները մտահոգիչ է համարում
Հասարակություն
14.06.2019 | 18:55
Հունիսի 7-ին անցկացվել է հայոց լեզու և գրականություն առարկայի միասնական քննությունը, որին մասնակցել է 5730 դիմորդ, նրանցից, սակայն, 1045-ը չի կարողացել հաղթահարել նվազագույն շեմը։
Այս մասին այսօր հրավիրված մամուլի ասուլիսի ժամանակ, ամփոփելով հայոց լեզու և գրականություն առարկայի միասնական քննության արդյունքները, ասաց Լեզվի պետական տեսչության նախկին պետ Լավրենտի Միրզոյանը։
Նրա փոխանցմամբ՝ թվում էր, թե անցյալ տարվա համեմատ առաջընթաց պետք է ունենանք, մինչդեռ արձանագրել ենք հետընթաց, որովհետև, եթե անցյալ տարի միջին միավորը եղել է 12,2 ապա այս տարի այն եղել է 11․6։
«Կտրվողների թիվը շատ է, դիմորդների թիվն անցյալ տարվա համեմատ լավ է, սակայն քննության արդյունքները մտահոգիչ են»,- ասաց Լավրենտի Միրզոյանը՝ նշելով, որ արձանագրված ցածր ցուցանիշների պատճառն այն է, որ երեխաները մայրենի առարկայից գիտելիք չեն ստանում։
«Պատճառն այն է, որ երեխաները մայրենիից նորմալ գիտելիք չեն ստանում, անգիր անելով են զբաղված: Նրանք բոլորը անգիր անելու տարբերակով են գիտելիք ստանում և գիտեն, թե որ հարցի պատասխանը որը կարող է լինել։ Երեխան հարցերի պատասխանը սովորում է, ենթադրյալ ճիշտ պատասխանի դիմաց նշան է դնում և դրանով գիտելիք ձեռք չի բերում։ Եթե երեխան առաջ խորությամբ բառագիտություն, շարադասություն, կետադրություն էր սովորում, հիմա այլևս այդպես չէ։ Անգիր անելով հնարավոր չէ գիտելիք ստանալ, երեխան պետք է անընդհատ շփվի գրավոր խոսքի հետ»,- իր խոսքը եզրափակեց նա:
