Ռուբեն Խաչատրյանը դիպչում է մեր պետական շահերին, երբ աշխարհով մեկ ասում է, որ Հայաստանը ապօրինի կենդանիների թրաֆիքինգի երկիր է․ Կենդանաբանական այգու նախկին աշխատակիցներ

Երևանի կենդանաբանական այգու նախկին աշխատակիցներն այսօր հրավիրված մամուլի ասուլիսի ժամանակ կրկին բարձրացրին այգու տնօրենի հրաժարականի հարցը։

Ըստ նախկին աշխատակիցների՝ տնօրեն Ռուբեն Խաչատրյանը միանձնյա կայացնում է այնպիսի որոշումներ, որոնք մեծ վնաս են հասցնում այգուն, իսկ այգում էլ ստեղծված են այնպիսի աշխատանքային պայմաններ, որոնց պատճառով լավ մասնագետները թողնում և հեռանում են։

«Մենք ցանկանում ենք, որ կենդանաբանական այգին լինի մաքուր, կազմակերպված՝ առանց անօրինությունների: Միանձնյա ու սարսափելի որոշումներ կայացնել մենք թույլ չենք տա, իսկ այն մարդիկ, որոնք այգու խնդիրների մասին բարձրաձայնել են, ազատվել են աշխատանքից։ Ստեղծվել են այնպիսի պայմաններ, որ մեր փայլուն մասնագետները թողնեն-գնան»,- ասաց այգու նախկին աշխատակից Կարեն Մարտիրոսյանը:

Ասուլիսին ներկա «Ջամբո» էկզոտիկ պարկի սեփականատեր Արտյոմ Վարդանյանն էլ, խոսելով Կենդանաբանական այգու տնօրեն Ռուբեն Խաչատրյանի հրաժարականի պահանջի մասին, նշեց, որ ինքն էլ է պնդում, որ Խաչատրյանը պետք է հեռանա, սակայն հերքում է այն տեղեկությունները, թե ինքն այդ հրաժարականի հետ կապված իր շահերն ունի։ «Մեր պայքարը ոչ մի շահ չունի, ոչ մի ակնկալիք չունի: Կենդանաբանական այգու տնօրեն Ռուբեն Խաչատրյանը պետք է հրաժարական տա: Մեր պայքարը կվերջանա այն դեպքում, երբ բերեն կենդանասեր, հասկացող տնօրենի»,- ասաց նա։

Արտյոմ Վարդանյանի խոսքով՝ իրենց գումարով սարքել են գեղեցիկ տարածք, որը, սակայն, սխալ է կառուցված, ինչի հետևանքով այգում կենդանիներ են սատկում։

«Ջամբո»-ի սեփականատերը նաև հայտնեց, որ սպասում են, որ խնդրին արձագանքի վարչապետը, իսկ եթե Կառավարության ղեկավարի կողմից արձագանք չլինի, իրենք կսկսեն ստորագրահավաք։ «Ռուբեն Խաչատրյանը  դիպչում է մեր պետական շահերին, երբ աշխարհով մեկ ասում է, որ Հայաստանը ապօրինի կենդանիների թրաֆիքինգի երկիր է: Այնինչ, նման բան չկա: Շուտով մի կով կամ ձուկ բերելու համար մեր ազգը մեծ խնդիր է ունենալու»,- ասաց նա։

Ասուլիսին ներկա կենդանաբանական այգու նախկին աշխատակից Անուշ Ռաֆայելյանն էլ նկատեց, որ Երևանի կենդանաբանական այգին այսօր եվրոպական այգիների համար վերածվել է ինչ-որ կարասի, որտեղից կարող են վերցնել թանկ կենդանիներ ու դրա դիմաց տալ անպետք կենդանիներ:

«Եթե նկատել եք՝ Հայաստանից ոչ մի մասնագետ այսօր Ռուբեն Խաչատրյանի կողքին կանգնած չէ: Ամիսը 4 անգամ ինչ-որ եվրոպացիներ են գալիս ու սկսում են գովաբանել: Ինչ-որ մեկի մոտ հարց չի ծագում, թե ինչո՞ւ է այդպես: Նոյեմբերից քննվում է զեբրի առեղծվածային դեպքը: Նա ընկել է, որից հետո տեղափոխել են փակ տարածք, և 3 օր անց սատկել: Հետո հայտարարում են, թե մեծ քանակությամբ թույն է հայտնաբերվել, ու դա Խաչատրյանի դեմ որպես սաբոտաժ է արվել: Մենք շահագրգռված ենք, որ ամեն ինչ բացահայտվի: Ի դեպ, ռենտգեն է արվել, ու երևում է, որ կենդանին ունեցել է վզի կոտրվածք, ինչ պատճառով ունեցել է վերջույթների թուլացում, հետո երևի թունավորել են»,- ասաց Ռաֆայելյանը՝ կրկին պահանջելով Կենդանաբանական այգում տնօրենի հրաժարականը։