05.02.2026 | 22:13
Օտարերկրացիների կողմից ՀՀ-ում հաշվառված մեքենայով ճանապարհային խախտումների մասին որոշումները կծանուցվեն սահմանային անցակետերում
Բողոքի ակցիա՝ Կառավարության դիմաց․ Կոնդի բնակիչները վարչապետից ու փոխվարչապետից պահանջում են լուծել իրենց բնակարանների հետ կապված խնդիրները
Հասարակություն
12.06.2019 | 12:36
Այսօր Կառավարության դիմաց բողոքի ակցիա են անցկացնում Կոնդի բնակիչները՝ վարչապետից և փոխվարչապետից պահանջելով ստեղծել չափագրումներ կատարող նոր հանձնաժողով, ապա նոր կատարել իրենց բնակարանների չափագրումները։
Բնակիչները պնդում են՝ Երևանի քաղաքապետարանի դիմաց իրենց բողոքի ակցիան արդյունք չի տվել, հիմա ստիպված են պահանջ ներկայացնել Կառավարության ղեկավարին։
«Չափագրումները սխալ են արել, հողը չեն չափել, դրսից չափագրումներ չեն արել, ինչի արդյունքում Կոնդի բնակիչներին ներկայացվել են շատ ավելի քիչ քառակուսի մետրեր»,- ասաց դժգոհող քաղաքացին՝ նշելով, որ իրենց անձնական միջոցներից վճարում են 30 հազար և ավելի գումար տները դրսից ճիշտ չափագրելու համար, սակայն դա Կադաստրի պետական կոմիտեն չի ընդունում։
Բնակիչները հայտնում են, որ իրենց չի բավարարում իրենց բարձրացրած խնդիրների վերաբերյալ Երևանի գլխավոր ճարտարապետ Արթուր Մեսչյանի կողմից ուղարկված գրավոր պատասխանը։
«Մեզ ասում են, որ մեր խնդիրների հարցով 2013 թվականին ձևավորվել է հանձնաժողով, բայց չէ՞ որ այդ հանձնաժողովի աշխատանքներից անգամ իրենք տեղյակ չեն։ Մեզ մոտ հարց է առաջանում, այդ ինչպե՞ս է ստացվում, որ նախկին իշխանության որոշ չինովնիկները Կոնդում հանրային տարածքներ են սեփականաշնորհում առանց խնդրի, իսկ մենք մեր տները սեփականաշնորհելու համար պետք է վճարենք։ Ինչի՞ համար վճարենք, չէ՞ որ ի վիճակի չենք»,- լրագրողների հետ զրույցում դժգոհեց մեկ այլ քաղաքացի։
Նշենք, որ բողոքի ակցիայի մասնակիցները կոնդեցիների ստորագրությամբ նամակ-խնդրանք են բերել՝ Կառավարության ղեկավարին հանձնելու համար:
Հիշեցնենք, որ մայիսի 17-ին ևս Կոնդի բնակիչները ակցիա էին կազմակերպել Երևանի քաղաքապետարանի առջև՝ նույն պահանջով։
Աղավնի Սուքիասյան
