ՀՀ-ն կարող է որոշակի ձգողականության կենտրոն դառնալ, այստեղ լուրջ մտավոր ռեսուրս կա. Միխայիլ Շվիդկո. ՏԵՍԱՆՅՈՒԹ

Ռուսաստանը կարող է օգնել Հայաստանին և Ադրբեջանին՝ հանրության տարբեր շրջանակների ներկայացուցիչների միջև հանդիպումներ կազմակերպելու համար: Factor.am-ի հետ զրույցում այս մասին ասաց ՌԴ նախագահի՝ միջազգային մշակութային համագործակցության հարցերով հատուկ ներկայացուցիչ, հատուկ հանձնարարություններով դեսպան Միխայիլ Շվիդկոն՝ հավելելով, սակայն, որ նման ձևաչափով շփման մասին որոշումը պետք է կայացնեն կողմերը:

«Ռուսաստանն այս դեպքում պատրաստ է միջնորդի և երաշխավորի դեր ստանձնել, ինչպես դա եղավ 2007, 2008, 2009 թթ., երբ մենք Արմեն Սմբատյանի և Փոլադ Բյուլբյուլօղլուի հետ տարբեր հանդիպումներ էինք կազմակերպում հայ և ադրբեջանցի հասարակության՝ խորհրդարանականների, լրագրողների, մշակույթի գործիչների միջև: Այսինքն՝ որոշակի փորձ կա, և եթե ռուսական մասնակցության կարիքը լինի և կողմերը խնդրեն օգնել, կօգնենք»,- ասաց ՌԴ նախագահի ներկայացուցիչը:

Միխայիլ Շվիդկոն ավելի վաղ հայտնել էր, որ հունիսին Երևան է գալու՝ Հայաստանի և Ադրբեջանի միջև հումանիտար շփման ձևաչափը հասկանալու, հայկական կողմի դիրքորոշումն ադրբեջանական կողմին փոխանցելու համար: Բայց այդ հարցով մանրամասն քննարկումներ Երևանում չի ունեցել: Ասում է՝ ժամանակին կարծում էր, որ մտավորականության ներկայացուցիչների հանդիպումների ձևաչափը կարող է շարունակվել, սակայն 2010 թվականին այն դադարեց գործել, քանի որ կողմերը համաձայնության չեկան:

«Հայաստանի կողմից, առաջին հերթին, այնպիսի տպավորություն կար, որ այդ կապերը ցանկալի արդյունք չեն տալիս: Տարբեր տեսակետներ, զգացողություններ կան: Հայաստանի՝ համենայն դեպս այն ժամանակվա իշխանությունների դիրքորոշումը բավական զուսպ էր. չեմ ուզում ոչ մի դեպքում քննադատել, դա երկրի իշխանությունների տեսլականն է երկրի շահերի մասին»,- նշեց նա:

Տարբեր ոլորտներում սերտ համագործակցության կարիք, ըստ Միխայիլ Շվիդկոյի, նաև Հայաստանն ու Ռուսաստանն ունեն: Ասում է՝ Դիլիջանում անցկացված «Մտքերի հայկական գագաթնաժողովը» հարթակներից մեկն էր: Միխայիլ Շվիդկոն այն հաջողված է համարում:

«Կարծում եմ՝ Հայաստանի համար նման գագաթնաժողովի անցկացումը շատ կարևոր էր: Հայաստան եկան բարձրորակ մասնագետներ, փորձագետներ ամենատարբեր ոլորտներից՝ էներգետիկայից մինչև բարձր տեխնոլոգիաներ: Պատահական չէ, որ կլոր սեղանների մի մասը նվիրված էր հենց գիտական և տնտեսական խնդիրներին: Կարծում եմ՝ գագաթնաժողովը հաջող անցավ: Ընդհանրապես, Հայաստանը կարող է որոշակի ձգողականության կենտրոն դառնալ, քանի որ այստեղ լուրջ մտավոր ռեսուրս կա, լավ կրթական համակարգ ու աշխարհագրական դիրք»,- գագաթնաժողովի արդյունքներն ամփոփեց Միխայիլ Շվիդկոն:

Ռուսաստանի նախագահի ներկայացուցիչը, սակայն, առավել արդյունավետ է համարում երկկողմ շփումները: Նա, միաժամանակ, ընդգծում է, որ դրանք պետք է ոչ թե ֆորմալ, այլ ավելի առարկայական ու արդյունավետ դարձնել:

Մանրամասները՝ տեսանյութում:

Թամարա Հակոբյան