01.11.2024 | 23:19
Հրդեհ Գյումրու տներից մեկում
Եթե 10 օրում հարցս լուծում չստանա, առանց զգուշացման ինքնահրկիզվելու եմ. նախկին զինծառայող
Հասարակություն
03.06.2019 | 14:18
Այսօր կեսօրին նախկին զինծառայող, 42-ամյա Մխիթար Ալումյանը գնացել էր Պաշտպանության նախարարություն և սպառնում էր ինքնահրկիզվել: Դեպքի վայր մեկնած փրկարարներին հաջողվել է կանխել քաղաքացու ինքնահրկիզումը:
Factor.am-ի հետ զրույցում Մխիթար Ալումյանը հայտնեց, որ իրեն մոտեցել և զրուցել է ՊՆ Մարդու իրավունքների և բարեվարքության կենտրոնի պետ, գնդապետ Ալեքսանդր Ավետիսյանը:
«Խոստացավ, որ 10 օրվա ընթացքում հարցը քննարկվի և լուծում կտրվի»,- ասաց նախկին զինծառայողը:
Նրա խոսքով՝ այդ քայլին գնացել է, քանի որ ստեղծված իրավիճակից այլ ելք չի տեսնում:
«22 տարի ծառայել եմ, տարին 9.5 ամիս դիրքերում եմ եղել: 2015թ. փաստաթղթերս տվել եմ, որ հերթագրեն՝ բնակարան ստանալու համար: Քանի որ դիպուկահարների հրամանատար էի ու դիրքերում էի, անձամբ գնալու և հերթագրվելու ժամանակ չունեի: Թոշակի անցնելուց հետո, պատահական իմանում եմ, որ ինձ ոչ մեկ չի հերթագրել»,- նշեց Մխիթար Ալումյանը։
2017 թվականի հուլիսի 1-ից թոշակի անցած Ալումյանն ընդգծեց, որ այս հարցով 2017 թվականի նոյեմբերից մինչ օրս պաշտպանության նախարարին 22 անգամ նամակ ու զեկուցագիր է ուղարկել, բայց ոչ մի անգամ պատասխան չի ստացել:
«Անձամբ նախարարություն էլ եմ եկել, բազմիցս նամակներ գրել, բայց ոչ մի թուղթ նախարարին չի հասել»,- նշեց Մխիթար Ալումյանը։
Մեզ հետ զրույցում նախկին զինծառայողն ասաց, որ ՊՆ շենքի մոտից ԱԻՆ աշխատակիցներն իրեն Ոստիկանության Նոր Նորքի բաժին են տարել, որտեղ բացատրագիր և ստորագրություն են պահանջել. «Հրաժարվեցի բացատրություն գրել և ստորագրություն տալ»:
Նա հավելեց, որ եթե 10 օր անց իր հարցի շուրջ նոր զարգացումներ չլինեն, կրկին Պաշտպանության նախարարություն է գնալու և այս անգամ առանց զգուշացման ինքնահրկիզվելու է:
ՊՆ Մարդու իրավունքների և բարեվարքության կենտրոնի պետ, գնդապետ Ալեքսանդր Ավետիսյանն իր հերթին Factor.am-ի հետ զրույցում ասաց, որ խնդիրը քաղաքացու ոչ հետևողական լինելու հետևանքով է. փաստաթղթերն ուղարկել է, սակայն չի հետևել գործընթացի ամբողջական իրականացմանը:
Նրա խոսքով՝ բնակարան ստանալու համար հերթագրվել քաղաքացիները կարող են նաև փաստաթղթերն ուղարկելով, այսինքն՝ անձամբ ՊՆ ներկայանալու կարիք չկա: Այդուհանդերձ, ըստ գնդապետի, Մխիթար Ալումյանն իր փաստաթղթերի՝ Պաշտպանւթյան նախարարություն հասնելու գործընթացին չի հետևել:
«Այս գործընթացն ինչ-որ փուլում կանգնել է, և նա այդպես էլ չի հերթագրվել»,- նշեց Ալեքսանդր Ավետիսյանը: Նա հավելեց, որ այսօր քաղաքացուն հանդիպելիս խոստացել է գործին ընթացք տալ. «Քաղաքացու դիմումն այս պահին քննարկվում է, և 10 օրվա ընթացքում նրան հստակ տեղեկատվություն կտրամադրվի: Ես նաև խոստացել եմ, որ կայցելեմ նրան և կփորձենք իրավական լուծում գտնել, ինչպես նաև հորդորել եմ դուրս գալ էմոցիոնալ վիճակից»:
Նելլի Մելքոնյան
