Անհամբեր սպասում եմ հրապարակային ներողությունների. Ալեն Սիմոնյան. ՏԵՍԱՆՅՈՒԹ

ՀՀ ԱԺ փոխնախագահ Ալեն Սիմոնյանը ֆեյսբուքյան ուղիղ եթերում մեկնաբանել է շրջանառվող տեղեկությունները, թե ինքը ապօրինի հարստացել է, նվեր է ստացել ավտոմեքենա:

«Ես հասկանում եմ, որ իմ խաչը ծանր է, որովհետև ես արձագանքում եմ քաղաքական մեր թիմին վերաբերող հարցերին և հաճախակի հարվածը ինձ վրա է գալիս։ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն ինձ մեղադրում է 7 միլիոն դրամ հարստանալու համար, և ես չեմ կարողացել բացատրել՝ որտեղից այդ գումարը։ Դա, իհարկե, սուտ է և ճշմարտությանը չի համապատասխանում»,- ասաց Ալեն Սիմոնյանը։

Նա պատմեց, որ վաճառել է իր Mitsubishi ավտոմեքենան՝ 11 500 ԱՄՆ դոլարով և գնել է 25 500 ԱՄՆ դոլարանոց նոր մեքենա։ Դրամական միջոցները չեն բավարարել, և նա դիմել է բանկին ու խնդրել, որ իր համար վարկային գիծ բացեն՝ 16 000 ԱՄՆ դոլարի չափով, ինչը երևում է ԱՔՌԱ համակարգում:

«Ընդամենը պետք էր ինձ զանգահարել և հարցնել՝ ինչպե՞ս կարող եմ ես դա բացատրել, և ես կբացատրեի: Այսուհետ թող որևէ մեկը չհամարձակվի ինձ վարկաբեկել, թույլ տա իրեն ինձ ասել՝ ինչ-որ մեկն ինձ մեքենա է նվիրել կամ ինձ համար գնել է»,- ասաց Սիմոնյանը:

Հիշեցնենք՝ FIP.am կայքը գրել էր, որ Ալեն Սիմոնյանի՝ բարձրաստիճան պաշտոնատար անձանց էթիկայի հանձնաժողով և Կենտրոնական ընտրական հանձնաժողով 2018 թվականին ներկայացրած հայտարարագրերում ունեցվածքի մասին տվյալները կեղծ են, և դա, հնարավոր է, արվել է ապօրինի հարստացումը թաքցնելու համար։

Ռոբերտ Անանյան