Երևանում քաշքշուկ է տեղի ունեցել մի խումբ զինվորականների և քաղաքացու միջև. ՏԵՍԱՆՅՈՒԹ

Ֆեյսբուք սոցիալական ցանցում տեսանյութ է հայտնվել, որում պատկերված է մի խումբ զինվորականներ և մի քաղաքացու միջև վիճաբանությունը: Տեսանյութը հրապարակել է Վահան Ջանոյան անուն-ազգանունով օգտատերը, որի հետ էլ տեղի է ունեցել միջադեպը:

Վահան Ջանոյանը Factor.am-ի հետ զրույցում տեղեկացրեց, որ նա երթևեկելիս է եղել, երբ մի խումբ զինվորակններ հանկարծակի հատել են փողոցը՝ անցնելու նպատակով: Վարորդն ազդանշան է տվել, զգուշացրել, որ չանցնեն չթույլատրված վայրով, ինչն էլ միջադեպի առիթ է հանդիսացել:

«Ես Ջրվեժից իջնում էի Մասիվ, տեսա, որ զինվորականները սկսեցին խմբակային հատել փողոցը՝ չնախատեսված վայրից: Ես սիգնալ տվեցի և արգելակեցի: Ես որ արգելակեցի, նրանք մոտեցան: Ասացի՝ չես տեսնո՞ւմ, որ 20 մետր այն կողմ «զեբրա» է, ինչո՞ւ ես այստեղով անցնում: Նա պատասխանեց, որ կանցնի՝ որտեղով կուզի: Ասում էին՝ ինչ կուզենք՝ կանենք, ծառայող տղերք ենք: Նրանք ինձ հայհոյեցին, ես՝ իրենց: Ավտոյի դռները սկսեցին բացել: Հետո եկավ նրանց հրամանատարը և նրանց տարավ, թե չէ երթևեկությունը կաթվածահար էր»,- մանրամասնեց Վահան Ջանոյանը:

Քաղաքացու պնդմամբ՝ զինվորականները եղել են ենթասպաներ, քանի որ այդ տարածքում ենթասպաների դպրոց կա: Դեպքը տեղի է ունեցել մայիսի 30-ին: Վահան Ջանոյանը մեզ հետ զրույցում ասաց, որ դեպքի կապակցությամբ իրավապահներին չի դիմել:

Պաշտպանության նախարարությունում միջադեպի մասին տեղյակ են: ՊՆ խոսնակ Արծրուն Հովհաննիսյանը Factor.am-ին փոխանցեց, որ ծառայողական քննություն է իրականացվում:

Մանրամասները՝ տեսանյութում:

Նարեկ Կիրակոսյան