Ալեքսանդր Ազարյանը գիտական կոչումից չի զրկվի. Սմբատ Գոգյան. ՏԵՍԱՆՅՈՒԹ

Ես երբեք անուններ չեմ նշել, մինչև մեկը գրավոր հարցում չի արել: Այս մասին ԱԺ գիտության, կրթության, մշակույթի, սփյուռքի, երիտասարդության և սպորտի հանձնաժողովի նիստից հետո լրագրողների հետ զրույցում ասաց ԲՈԿ նախագահ Սմբատ Գոգյանը՝ անդրադարձավ իր հայտարարությանը, որ մի շարք ռեկտորների աստիճանների և կոչումների մասով խնդիրներ կան:

Լրագրողի հարցին՝ ինչ-որ մեկը եկել է ու ասե՞լ է, որ դատավոր Ալեքսանդր Ազարյանը գրագողություն է արել, Գոգյանը պատասխանեց. «Հիմա իմ ասածին հավատո՞ւմ եք, թե՞ ոչ: Ես անուններ չեմ նշում: Այդ մարդը գիտությունների թեկնածու է, ուղղակի զայրացած էր, ասաց՝ ես այդ մարդուն ճանաչում եմ, նա չէր կարող դիսերտացիա գրել: Դրանցի հետո 1in.am-ը մեզ հարցում ուղարկեց՝ կոնկրետ այդ մարդու անունը նշելով, մենք էլ պատասխանեցինք: Իր ատենախոսությունը 2 այլ ատենախոսությունների հետ ունի համընկնում: Նրանցից մեկը պաշտպանել էր իրենից առաջ, մյուսը՝ իրենից հետո: Համընկել էր Վազգեն Ռշտունու և Տիգրան Նահապետյանի աշխատանքների հետ»:

Գոգյանը նշեց, որ այս հարցով մի քանի անգամ դիմել է ԵՊՀ նախկին ռեկտոր Արամ Սիմոնյանին. «Ազարյանը պաշտպանել է 2005 կամ 2006 թվականին, դրա համար այդ դեպքի համար հետ չենք գնացել»:

Լրագրողների հարցին՝ ինչո՞ւ հիմա այս տեղեկությունները տարածվեցին, արդյո՞ք դա կապված էր Ռոբերտ Քոչարյանի գործի հետ և ինչո՞ւ Վճռաբեկ դատարանի քրեական պալատի անդամ Լիլիթ Թադևոսյանի դեպքը չի բարձրաձայնվում, երբ մամուլում ասում էին, որ վերջինիս աշխատանքը նույնպես «քոփի փեսթ» է, Գոգյանը պատասխանեց. «Որովհետև դեռ ոչ ոք չի եկել ԲՈԿ և գրություն չի գրել՝ խնդրելով ստուգել Լիլիթ Թադևոսյանի աշխատանքը»:

Նա նաև ասաց, որ Ալեքսանդր Ազարյանը գիտական կոչումից չի զրկվի:

Մանրամասները՝ տեսանյութում:

Նարեկ Կիրակոսյան