Նախկինում հիմնադրամներին փոխանցում անելը եղել է մոնոպոլիա. Աննա Հակոբյան. ՏԵՍԱՆՅՈՒԹ

Բոլորիս ուզում եմ ուղղակի խորհուրդ տալ՝ ի վերջո ազատվենք համեմատականից և զերծ մնանք նախկինում տեղի ունեցած երևույթները ներկա իշխանությունների և հարաբերությունների վրա պրոյեկտելու ցանկությունից կամ սովորությունից: Այսօր հրավիրված մամուլի ասուլիսում ասաց վարչապետի տիկին Աննա Հակոբյանը՝ անդրադառնալով «Իմ քայլը» հիմնադրամին նվիրատվություն կատարողներին և այն փաստին, որ այդ անձանց թվում կան այնպիսիք, որոնք նախկին իշխանության օրոք ևս նման նվիրատվություններ արել են՝ հաճոյանալու նպատակով։

Աննա Հակոբյանը շեշտեց՝ նման հարցերի անդրադառնալը ժամանակի և ռեսուրսի անիմաստ վատնում է համարում. «Ես հիմա գուցե մի հինգ րոպե խոսեմ այդ մասին, Դուք էլ ձեր լրատվամիջոցում հոդված գրեք, բայց դա ռեսուրսի ու ժամանակի վատնում է: Չկա նման բան ու չի կարող լինել: Երկու հիմնադրամներին նվիրատվություն անել ազատ են բոլորը: Հիմնադրամներին նվիրատվություն անելը նախկինում եղել է մոնոպոլիա. ոչ բոլորն են իրավունք ունեցել երկրի ղեկավարի տիկնոջ հիմնադրամին նվիրատվություն անել: Երբեմն մեր հանդիպումներին մարդիկ միջնորդներով են գուցե ուզում ճշտել՝ կարո՞ղ են, թե՞ դա կրկին ինչ-որ բան է նշանակում: Մենք առաջին իսկ օրից ասել ենք՝ չունենք նման բարդույթ՝ ո՛չ նախկին, ո՛չ ներկա, ո՛չ ապագա մարդկանց հետ կապված: Մենք մեր անելիք աշխատանքը, նպատակները ներկայացնում ենք բոլորին և բոլորի նվիրատվության համար շնորհակալ ենք, քանի որ դրանք ծառայելու են մեր նպատակների իրականացմանը: Դա կլինի թոշակառուի 2000 դրամ, քանի որ հազար դրամով անգամ նվիրատվություն ունենք մեր հաշվեհամարներին, թե Ձեր նշած մարդկանց նվիրատվություն, կամ այլ համագործակցություն»:

Մանրամասները՝ տեսանյութում։

Շողիկ Գալստյան