01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Համահայկական խաղերի համաշխարհային կոմիտեն աշխատանքային խորհրդակցություն է անցկացրել
27.05.2019 | 12:58
Մայիսի 26-ին տեղի է ունեցել Համահայկական խաղերի համաշխարհային կոմիտեի աշխատանքային խորհրդակցությունը, որը վարել է կոմիտեի նախագահ Իշխան Զաքարյանը: Խորհրդակցությանը, որի ընթացքում քննարկվել է հարցերի լայն շրջանակ, ներկա են եղել կոմիտեի փոխնախագահներ Ալբերտ Բոյաճյանը, Ստեփան Դերբեդրոսյանը, Ռոլանդ Շառոյանը և գործադիր կոմիտեի անդամները:
Իշխան Զաքարյանը ներկայացրել է Համահայկական ամառային 7-րդ խաղերի բացման և փակման արարողությունների ստեղծագործական խմբին, խաղերի գլխավոր մրցավարին և պատասխանատուներին: Ներկայացվել են նաև խաղերի ջահը վառելու արարողության ընթացքը և այլ կազմակերպչական ծրագրեր:
Այս տարի ևս, ի նշան Հայաստան-Արցախ-Սփյուռք եռամիասնության, կվառվի երեք ջահ: Խորհրդակցության ընթացքում քննարկվել են մասնակիցներին Երևանում դիմավորելու, նրանց Արցախ ուղեկցելու և տեղավորելու հետ կապված հարցեր: Իշխան Զաքարյանի խոսքով՝ ինչպես նախորդ երեք՝ ամառային ն 5-րդ, 6-րդ և ձմեռային առաջին խաղերի, այնպես էլ այս խաղերի կազմակերպման ու անցկացման ծախսերը հոգալու են հովանավորները։
Համահակական խաղերն առաջին անգամ անցկացվելու են Արցախում: Բացման հանդիսավոր արարողությունը տեղի է ունենալու Ստեփանակերտում, ուստի կազմակերպիչներն առանձնահատուկ ուշադրություն են դարձնում բոլոր մանրուքներին: Նպատակն է, որպեսզի մասնակիցները ոչ միայն հետաքրքիր անցկացնեն խաղերը, այլև առնչվեն Արցախի պատմությանը, մշակույթին, հյուրընկալ մթնոլորտին՝ էլ ավելի ջերմացնելով Հայաստան-Արցախ-Սփյուռք կապը:
Համահայկական խաղերի համաշխարհային կոմիտեի գործկոմի նիստը տեղի կունենա մայիսի 28-ին Արցախում:
