30.10.2026 | 14:46
Հայտնի է՝ երբ է բացվելու «Միլանի» և «Ինտերի» նոր ստադիոնը
«Արսենալ»-ն ՈՒԵՖԱ-ին քննադատել է Եվրոպայի լիգայի եզրափակիչը Բաքվում անցկացնելու որոշման համար
16.05.2019 | 18:37
«Արսենալ» ֆուտբոլային ակումբը հայտարարություն է տարածել՝ դժգոհություն հայտնելով Եվրոպայի լիգայի եզրափակիչը Բաքվում անցկացնելու՝ ՈՒԵՖԱ-ի որոշման կապակցությամբ: Նշենք, որ մայիսի 29-ին Բաքվում մրցելու են լոնդոնյան երկու ակումբներ՝ «Արսենալ»-ն ու «Չելսի»-ն:
«Արսենալ»-ի պաշտոնական կայքում հրապարակված հայտարարությունում նշվում է, որ ուրախ են Եվրոպայի լիգայի եզրափակիչ հասնելու առիթով և անհամբերությամբ են սպասում «Չելսիի» դեմ խաղին, միաժամանակ հավելելով, որ հիասթափված են այն Բաքվում անցկացնելու որոշման կապակցությամբ:
«Մենք խորապես հիասթափված ենք այն փաստից, որ տրանսպորտային սահմանափակումների պատճառով ՈւԵՖԱ-ն կարող է «Արսենալ»-ին ընդամենը 6 հազար տոմս տրամադրել 60 հազար երկրպագու ընդունող ստադիոնում: Ժամանակը ցույց կտա՝ արդյո՞ք գոնե 6 հազար երկրպագու կկարողանա ներկա լինել հանդիպմանը՝ հաշվի առնելով, թե որքան բարդ է այդպիսի ճանապարհորդությունը»,- ասվում է հայտարարությունում:
Դրանում նաև նշվում է, որ «Արսենալ»-ը 45.000 սեզոնային աբոնեմենտ ունեցող երկրպագուներ ունի, և նման թվով երկրպագուների պարագայում սահմանափակ տրանսպորտային հնարավորություններով եզրափակիչի վայր ընտրելը պարզապես ճիշտ չէ:
«Մենք այդ հարցով բազմաթիվ բողոքներ ենք ստացել մեր երկրպագուներից, և ամբողջությամբ կիսում ենք այդ դժգոհությունը: Նրանց անունից կցանկանայինք իմանալ այն չափանիշները, որոնց համաձայն ընտրվում են եզրափակիչ խաղերի անցկացման վայրերը, ինչպես նաև՝ արդյո՞ք հաշվի են առնվում երկրպագուների պահանջները»,- նշվում է «Արսենալ»-ի հայտարարությունում:
Ավելի վաղ Ադրբեջանի Ֆուտբոլի ֆեդերացիաների ասոցիացիան ՈՒԵՖԱ-ին հավաստիացրել էր, որ Լոնդոնի «Արսենալ»-ի հայազգի կիսապաշտպան Հենրիխ Մխիթարյանը Բաքու այցելելու հետ կապված խնդիր չի ունենա: Չնայած դրան՝ Մխիթարյանի մասնակցությունն առայժմ հարցականի տակ է:
