08.11.2026 | 21:21
Առատ ձյան պատճառով Գորայք-Մեղրի ճանապարհը փակ է կցորդիչով բեռնատարների համար
Պարգևավճարների, աշխատավարձերի և այլ ծախսերի համար ԱԺ-ին մոտ 1 միլիարդ դրամ է տրվելու, որից 183 միլիոն դրամը՝ ԱԺ նախագահի արտերկիր այցերի ավելացման նպատակով
Քաղաքականություն
16.05.2019 | 09:45
Պատգամավորների թվի ավելացմամբ Ազգային ժողովի բյուջեն չի բավարարում: Խորհրդարանը կառավարությունից 892 միլոն 600 հազար դրամ հավելյալ գումար է ուզում:
Պարզվում է, որ 2019 թվականին 59-ով ավելացել է խորհրդարանի աշխատակիցների թիվը եւ նրանց աշխատավարձի համար պահանջվում է 403 միլիոն դրամ։ Այս գումարի մեջ է մտնում նաեւ վեցերորդ գումարման ԱԺ-ի որոշ աշխատակիցների վերջնահաշվարկը: Այս մասին Factor.am-ը տեղեկանում է կառավարության նիստի օրակարգ ընդգրկված նախագծից:
Նախագծի համաձայն՝ 94 միլիոն դրամ էլ անհրաժեշտ է պարգեւավճարներ տալու համար: 27 պատգամավորի, որպես պատգամավորական գործունեության փոխհատուցման վճար, տրվելու է 16 մլն 200 հազար դրամ, իսկ 25 պատգամավորի բնակարանի վարձի փոխհատուցման համար՝ 30 մլն դրամ:
Արտասահմանյան գործուղումների համար նշյալ գումարից հատկացվելու է 301 մլն 802 հազար դրամ, որից 118 մլն 285.7 հազար դրամը՝ պայմանավորված պատգամավորների թվի, և 183 մլն 516.3 հազար դրամը՝ՀՀ Ազգային ժողովի նախագահի այցերի (Ռուսաստանի Դաշնություն, Վրաստան, Բելգիա, Նիդերլանդներ, Ֆրանսիա (Ստրասբուրգ), Իտալիա, Մեծ Բրիտանիա, Իրան, Արաբական Միացյալ Էմիրություններ) ավելացմամբ:
Կառավարության օրակարգ ընդգրկված մեկ այլ նախագծի համաձայն էլ կառավարության պահուստային ֆոնդից 85 մլն դրամ գումար ԱԺ-ին կտրամադրվի տեխնիկական հագեցվածության բարելավման նպատակով: Նախատեսվում է 4 ռենտգենային զննող սարք ձեռք բերել, որոնցից երեքը տեղակայվելու են անցակետերում, մեկը՝ ԱԺ նախագահի մուտքի մոտ:
Այսպիսով՝ այս եւ այլ ծախսերի հանրագումարով ստացվում է, որ Ազգային ժողովին տրվելու է մոտ մեկ միլիարդ դրամ:
Նարեկ Կիրակոսյան
