Լոռիում կան աշակերտներ, որոնք դպրոց են հաճախում սառը զենքերով

Այսօր Լոռու մարզի դպրոցների տնօրենների հետ հանդիպման ժամանակ մարզպետ Անդրեյ Ղուկասյանը հայտարարեց, որ մարզի որոշ դպրոցներում աշակերտները դասի են հաճախում իրենց հետ տանելով սառը զենքեր:

Վերջերս նույնիսկ մարզում գրանցվել է աշակերտների կողմից միմյանց դանակահարելու մի քանի դեպք: «Վերջին շրջանում ունեցել ենք 2 դեպք, երբ դասաժամին աշակերտներն իրար դանակահարել են և ունենք դեպք, երբ այդ ամեն ինչն ավարտվել է մահվան ելքով: Չեմ նշի դպրոցը, բայց վերջերս տնօրենի աշխատասենյակում խուզարկության ժամանակ հայտնաբերվել են սառը զենքեր, որոնք հավանաբար աշակերտներից է վերցրել»,-ասաց նա:

Մարզպետը տնօրեններին հորդորեց դպրոցներում իրականացնել ամենօրյա հսկողություն․ կամ իրենք իրավիճակը վերահսկեն, կա՛մ էլ դիմեն իրավապահ մարմինների օգնութանը.

«Ինքներդ հսկեք, իրավիճակին տիրապետեք, և այն աշակերտները, որոնք որ կփորձեն ինչ-որ մի տեսակի սառը զենքով դպրոց մուտք գործել, եթե դուք ինքներդ չեք կարողանում այդ հարցը կարգավորել, դիմեք կա՛մ մեզ, կա՛մ իրավակապ մարմիններին տեղյակ պահեք»,-նշեց Ղուկասյանը:

Հանդիպման ժամանակ Ղուկասյանն անդրադարձավ նաև վերջես բացահայտված քրեական գործերին: Նախնական տվյալներով մարզի մի քանի դպրոցների տնօրեններ կասկածվում են չարաշահումների և դրամական միջոցներ յուրացնելու մեջ:

Նրա խոսքով՝ այն տնօրենները, որոնց հետ կապված կլինեն քրեական գործեր, պետք է ազատվեն զբաղեցրած պաշտոններից:

«Կցանկանայի, որպեսզի տնօրենների հետ կապված որևէ քրեական գործ չլիներ մեր մարզում, բայց իրականությունն այլ է: Այդ տնօրենները պետք է ազատվեն դպրոցի իրենց զբաղեցրած պաշտոնից: Դա միանշանակ է և առանց բացառության: Եվ գուցե օրենսդրական փոփոխություններ լինեն, որպեսզի դրանից հետո այդ մարդիկ 5 կամ 10 տարի չկարողանան զբաղեցնել ղեկավար պաշտոններ: Նման մարդիկ դպրոցում անելիք չունեն: Իսկ այն տնօրենները, որոնք իրենց աշխատանքը կատարում են բարեխիղճ և կրթության որակ են ապահովում, այդ տնօրենները լինելու են իմ բարեկամները և ես ցանկացած հարցով պատրաստ եմ օգնել»,- վստահեցրեց մարզպետը:

Տաթևիկ Ղազարյան