Արամի 23 շենքի համար, իբր, 200 հազար եվրոյի ծրագիր էին ներկայացրել․ ո՞վ է տալու էդ փողը՝ չգիտեմ․ գնդակը Մշակույթի նախարարության դաշտում է․ Մեսչյան. ՏԵՍԱՆՅՈՒԹ

Երևանի գլխավոր ճարտարապետ Արթուր Մեսչյանն այսօր հրավիրված մամուլի ասուլիսի ընթացքում անդրադարձավ  Երևանում շինարարություն սկսելու համար փորված հիմքերին, որտեղ այդպես էլ շինարարություն  չի ընթանում:

Ըստ գլխավոր ճարտարապետի՝ Կասկադի տարածքում կա  խնդիր, մենք փորձում ենք գտնել այնպիսի կառուցապատողների, որոնք կարող են ավարտին հասցնել Կասկադի շինարարությունը և արդեն հնարավոր կլինի միանգամից բարձրանալ արձանի հարթակի վրա, դրա համար նախագիծ արդեն մշակվել է։ «Բայց նորից գալիս ենք նույն կետին․ տղերք փող չկա։ Կասկադի ավարտումը քաղաքապետարանի համար դառնում է  առաջնային խնդիր»,- այսօր հրավիրված մամուլի ասուլիսի ժամանակ ասաց  Երևանի գլխավոր ճարտարապետ Արթուր Մեսչյանը։

Վերջինս նշեց, որ հաջորդ մտահոգող տարածքը Երիտասարդական պալատի տարածքն է։

«Երիտասարդական պալատի կառուցապատողի հետ որևէ հնարավորություն չկա հանդիպելու և հասկանալու, թե ինչ ծրագիր է ներկայացնելու, կամ ներկայացնելո՞ւ է արդոք, թե՝ ոչ։ Հենց այստեղ է, որ խնդիր ունենք օրենքի դաշտում, եթե լիներ այնպիսի օրենք, որ եթե կառուցապատող ընկերությունը փոսորակ է անում և երկու տարվա ընթացքում շինարարություն չիրականացնելու դեպքում զրկվում է սեփականության իրավունքից, մենք այսպիսի կիսակառույցների խնդիր չէինք ունենա»,- ասաց  Արթուր Մեսչյանը։

Երևանի գլխավոր ճարտարապետն անդրադարձավ նաև Արամի 23-ի շենքի կառուցմանը և նշեց, որ Իտալիայից ժամանել էին մասնագետներ, ներկայացրել շենքի վերականգնման իրենց տարբերակը, սակայն մինչ այս պահը որևէ աշխատանք չի իրականացվել։

«Հարց է առաջանում՝ ի՞նչ է կատավում այդ շենքում։ 200 հազար եվրոյի ծրագիր էին ներկայացրել, հիմա ո՞ւր է այդ գումարը, ո՞վ պետք է տա, ախր էնպիսի թեմաներ են պտտվում, որոնք մեր տիրույթից դուրս են։ Այդ հարցը 100 տոկոսով  գտնվում է  Մշակույթի նախարարության դաշտում։ Արամի 23 շենքի վիճակն այսօր շատ ավելի վատ վիճակում է, քան այն օրը, երբ շենքի պատը փլվեց»,- ասաց Մեսչյանը։

Մանրամասները՝ տեսանյութում։