Միջպետական ճանապարհի եզրին գտնվող դպրոցը ցանկապատված չէ. պատասխանատուները վստահեցնում են՝ խնդիրը կլուծվի

Վանաձորի Խաչատուր Աբովյանի անվան թիվ 9 դպրոցը գտնվում է միջպետական ճանապարհի եզրին, մինչդեռ 189 աշակերտ ունեցող կրթօջախի շենքը փողոցից բաժանող ցանկապատ չունի: Տնօրեն Անահիտ Վարդանյանն ասում է՝ ամեն օրը ուսուցչական կազմի համար լարված է անցնում, մինչև դասերն ավարտվում են, երեխաները՝ գնում տուն:

Դպրոցի հարևանությամբ գծանշում կա, արագությունը սահմանափակող ճանապարհային նշան՝ նույնպես, սակայն, ըստ տիկին Վարդանյանի, վարորդներին դա չի խանգարում արագ վարել:

«Դասամիջոցին ես վախենում եմ դպրոցի դռները բացել, որովհետև երեխաները վազում են: Էներգիա ունեն, պետք է սպառեն: Բայց դպրոցը ճանապարհից մի մայթ է բաժանում, իսկ այստեղ շատ արագ են վարում մեքենաները: Անընդհատ դեպքեր են գրանցվում են: Չպետք է անպայման ինչ-որ դժբախտ դեպք լինի, որ այս հարցին լուծում տան: Շատ ենք վախենում, միշտ վտանգ կա: Հսկողությունը շատ ուժեղ է, բայց չես կարող բոլոր երեխաների հետևից վազել»,- ասաց դպրոցի տնօրենը:

Անահիտ Վարդանյանը նախկինում ևս բազմաթիվ անգամներ բարձրացրել է հարցը: Ի վերջո՝ տարածքում արագաչափ է տեղադրվել: Հեղափոխությունից հետո, սակայն, այս արագաչափը ևս հանվել է. «Արագաչափի ժամանակ վարորդները զգույշ ու ուշադիր էին, մենք էլ ավելի հանգիստ էինք: Հիմա արագաչափը չկա, նորից նույն պատկերն է: Արագության սահմանափակման նշանը ոչ մի նշանակություն չունի:  Արագաչափը ճիշտ էր, վարորդները, ամեն դեպքում, զսպվում էին, որովհետև գիտեին, որ կտուգանվեն, իսկ ոչ մեկը չի ուզում, որ իր գրպանին կպնեն»:

Դպրոցը ցանկապատելու համար տնօրինությունը դիմել է նախկին մարզպետ Արթուր Նալբանդյանին: Գումար տրամադրել են, սակայն աշխատանքներն այդպես էլ չեն արվել: Հիմա պատրաստվում են խնդրով դիմել նոր մարզպետ Անդրեյ Ղուկասյանին:

«Չստացվեց, որովհետև դպրոցի հետնամասում մասնավոր տուն կա, և այդ տուն գնացող այլ ճանապարհ չկա, դպրոցի բակով է անցնում: Հարցն այդպես էլ մնաց, իսկ հատկացված գումարով դպրոցում կոսմետիկ վերանորոգում իրականացվեց: Հիմա ուզում եմ դիմել պարոն Ղուկասյանին, որպեսզի տեսնենք՝ մարզպետը կարո՞ղ է աջակցել, մենք մի փոքր դարպաս կամ ցանկապատ տեղադրենք, փողոցից կտրվենք»,- ասաց Անահիտ Վարդանյանը:

Վանաձորի գլխավոր ճարտարապետ Սուրեն Աբովյանը մեզ հետ զրույցում ասաց, որ համայնքապետարանում խնդրի մասին տեղյակ են, կազմվել է նախագիծ-նախահաշիվ, որպեսզի նշված տարածքում կառուցվի արհեստական խոչընդոտ: Նման խոչընդոտ կկառուցվի նաև թիվ 7 դպրոցի մոտ, որը նույնպես միջպետական ճանապարհի եզրին է:

«Արհեստական խոչընդոտները կլինեն փողոցի մակարդակից 8 սմ բարձրությամբ: Յուրաքանչյուր խոչընդոտի համար տրամադրվել է մոտ 450.000 դրամ: Աշխատանքների համար մրցույթ կհայտարարվի հունիսին՝ ճանապարհների հիմնանորոգման աշխատանքների հետ միասին: Մինչև նոր ուսումնական տարին խնդիրը լուծված կլինի»,- վստահեցրեց գլխավոր ճարտարապետը:

Տաթևիկ Ղազարյան