Մեր վարկանիշի հետ ոչինչ չի լինի, որովհետև ես ազնիվ եմ մարդկանց հետ. Նիկոլ Փաշինյանի հարցազրույցը ՌԲԿ-ին

ՀՀ վարչապետ Նիկոլ Փաշինյանը վստահ է, որ ժողովրդի կողմից իշխանությանն աջակցությունը չի նվազի: Այս մասին նա ասել է ռուսական ՌԲԿ-ին տված հարցազրույցում: ՌԲԿ-ի տնօրեն Իլյա Դորոնովի հարցին՝ ինչո՞ւ է այդքան վստահ, վարչապետը պատասխանել է. «Վստահ եմ, որովհետև ես ազնիվ եմ մարդկանց հետ: Հայաստանում ոչ ոքի համար ոչ մի տնտեսական կամ քաղաքական սահմանափակում չի լինելու:

Յուրաքանչյուրը հնարավորություն կունենա իրացնել սեփական տաղանդը»: Ըստ վարչապետի՝ Հայաստանում տեղի ունեցած հեղափոխության առանձնահատկություններից էր այն, որ այն պրագմատիզմի նկատմամբ ռոմանտիզմի հաղթանակն էր. «Հայաստանում հիմա ամեն ինչ այնպես է, ինչպես մենք կարծում էինք: Եվ այդպես էլ շարունակվելու է»:

Խոսելով հեղափոխության ընթացքի մասին՝ Նիկոլ Փաշինյանը պատմել է, որ քաղաքական գործունեությունը սկսել է 2007 թվականին, Ազատության հրապարակից, բայց այն մեկուսացած վայր է համարում:

«Եթե նույնիսկ 20.000 մարդ այստեղ ցույց անի, հարևան փողոցներից կարելի է նույնիսկ չնկատել: Խնդիր էինք դրել դուրս պրծնել այստեղից, և գնացինք Ֆրանսիայի հրապարակ: Մարդկանց մոտ, ինձ մոտ նույնպես, տպավորություն էր, որ բոլոր ընդդիմադիր շարժումները, որ այստեղ են տեղի ունեցել, արդյունքում պարտվել են: Իրականում նախապես մենք զգալի հաջողություններ չունեինք, բայց ամսի 16-ին մեզ մոտ բեկում տեղի ունեցավ, և մենք որոշեցինք, որ այստեղից էլ ենք գնում ենք, և անցանք Հանրապետության հրապարակ: Եվ այնտեղ արդեն հասկանալի էր, որ Հայաստանում հեղափոխություն է տեղի ունեցել»,- պատմել է Նիկոլ Փաշինյանը: