16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ադրբեջանն ՈՒԵՖԱ-ին վստահեցրել է, որ Մխիթարյանը Բաքվում անցկացվելիք խաղին մասնակցելու համար Ադրբեջան այցելելու խնդիր չի ունենա
Քաղաքականություն
10.05.2019 | 17:47
Ադրբեջանի Ֆուտբոլի ֆեդերացիաների ասոցիացիան ՈՒԵՖԱ-ին հավաստիացրել է, որ Լոնդոնի «Արսենալ»-ի հայազգի կիսապաշտպան Հենրիխ Մխիթարյանը Բաքու այցելելու հետ կապված խնդիր չի ունենա: Նշենք, որ Ադրբեջանի մայրաքաղաքում մայիսի 29-ին նախանշված է Եվրոպայի լիգայի խաղարկության եզրափակիչ՝ «Արսենալ»-«Չելսի» հանդիպմանը: Այս մասին ՏԱՍՍ-ին հաղորդել են ՈՒԵՖԱ-ի մամուլի ծառայությունից:
«ՈՒԵՖԱ-ի հովանու ներքո անցկացվող հանդիպումներին մասնակցելու համար ֆուտբոլիստների համար այլ երկրների վիզա ստանալու նպատակով ֆուտբոլային ասոցիացիաների, ակումբների և դեսպանատների հետ նամակագրությունը կազմակերպության համար ստանդարտ գործընթաց է: Այս հարցով ՈՒԵՖԱ-ն և «Արսենալ»-ը հաստատում են խնդրել, իսկ Ադրբեջանի Ֆուտբոլի ֆեդերացիաների ասոցիացիան հաստատել է, որ այդ ֆուտբոլիստը երկիր այցելելու խնդիր չի ունենա, ինչպես նաև կձեռնարկվեն անվտանգության համար անհրաժեշտ բոլոր միջոցառումները»,- ասված է ՈՒԵՖԱ-ի հաղորդագրությունում:
Հենրիխ Մխիթարյանը 2015 թվականին՝ Դորտմունդի «Բորուսիա»-ում հանդես գալու ընթացքում, անվտանգության նկատառումներից ելնելով, բաց էր թողել ադրբեջանական «Գաբալա»-ի հետ արտագնա հանդիպումը: Այս մրցաշրջանում էլ Մխիթարյանը բաց է թողել Եվրոպայի լիգայի խաղարկության խմբային փուլի արտագնա հանդիպումն ադրբեջանական «Ղարաբաղ» ակումբի հետ, որն անցկացվել է Բաքվում:
Աղբյուրի փոխանցմամբ՝ «Արսենալ»-ի գլխավոր մարզիչ Ունաի Էմերին Մխիթարյանի բացակայությունը պարզաբանել է այն հանգամանքով, որ նա «չի կարող ժամանել այստեղ», իսկ «Ղարաբաղի» մարզիչ Կուրբան Կուրբանովը ենթադրել է, որ ակումբը կարող էր ֆուտբոլիստին զերծ պահել ճնշումից, որը նրան սպասվում էր Ադրբեջանում հայտնվելու դեպքում:
Հենրիխ Մխիթարյանն այս մրցաշրջանում Եվրոպայի լիգայում 11 խաղ է անցկացրել՝ դառնալով երեք գոլային փոխանցման հեղինակ և ստանալով երկու դեղին քարտ:
