30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Արդյոք վարչապետին, ԱԺ նախագահին, Սասուն Միքայելյանին կալանավորելու միջնորդություն կրկին կներկայացնե՞ք, եթե քաղաքական իրավիճակ փոխվի․ պատգամավորը՝ գլխավոր դատախազին․ ՏԵՍԱՆՅՈՒԹ
Քաղաքականություն
10.05.2019 | 15:33
Ազգային ժողովի «Իմ քայլը» խմբակցության պատգամավոր Թագուհի Թովմասյանն այսօր Ազգային ժողովում ՀՀ գլխավոր դատախազ Արթուր Դավթյանից հետաքրքրվեց՝ ի՞նչն էր պատճառը, որ հնարավոր չեղավ ՀՀ նորագույն պատմության ամենախոշոր կոռուպցիոն գործարքի մեջ մեղադրվող ՀՀԿ-ական նախկին պատգամավոր Արամ Հարությունյանի կալանքի հարցը լուծել այնպես, որ նա չհասցներ երկրից դուրս գալ և այժմ էլ գտնվեր հետախուզման մեջ։
Պատգամավորը հետաքրքրվեց նաև՝ ինչո՞ւ Գլխավոր դատախազությունը ԴԱՀԿ նախկին պետ և նախկին պատգամավոր Միհրան Պողոսյանին թույլ տվեց երկրից դուրս գալ, իսկ պաշտպանության նախկին նախարար Սեյրան Օհանյանին, երբ նա դեռ Մարտի 1-ի գործով վկայի կարգավիճակ ուներ, արգելվեց Վրաստան հասնել, հետևաբար ինչո՞վ էր պայմանավորված երկու գեներալների նկատմամբ դրսևորված վերաբերմունքի տարբերությունը։
Թագուհի Թովմասյանի հաջորդ հարցը վերաբերում էր ուղիղ մեկ տարի առաջ գլխավոր դատախազի այն միջնորդությանը, ըստ որի, պետք է կալանավորվեին Նիկոլ Փաշինյանը, Արարատ Միրզոյանը և Սասուն Միքայելյանը՝ հիշեցնելով, որ նրանց կալանավորելու միջնորդությունը վերացավ, երբ դրան միջամտեց նախկին վարչապետ Կարեն Կարապետյանը։
«Ստացվում է՝ ՀՀ գլխավոր դատախազը քաղաքական հրահանգներով ուղղորդվող պաշտոնյա է, որովհետև, փաստորեն, վարչապետը կարող է միջնորդել և ասել, որ այս մարդիկ չպետք է կալանավորվեն և չեն կալանավորվի, և հակառակը։ Հետաքրքիր է, եթե քաղաքական իրավիճակ փոխվի նույն մարդիկ Ձեր կողմից էլի կներկայացվե՞ն կալանքի»,- դատախազին հարցեր ուղղեց պատգամավորը։
Մանրամասները՝ տեսանյութում։
